Dástúrli «Bolat Turlyhanovtyń kýbogi» 2015 jyldan beri Halyqaralyq kúres federasııasynyń is-sharalar josparyna engen. Sonymen qatar Qazaqstanda grek-rım kúresinen jalǵyz mártebesi bar týrnır sanalady. Kúres tarıhyna úńilsek, atalǵan týrnır álemdik arenada atoı salǵan talaı dańqty balýandardyń tomaǵasyn sypyrǵan aıtýly jarys ekenine kóz jetkizemiz. Bul rette el dańqyn asyrǵan Iýrı Melnıchenko, Mkhıtar Manýkıan, Baqtııar Báıseıitov, Georgıı Sýrsýmııa, Nurbaqyt Teńizbaev, Nurmahan Tinálıev syndy bozkilem sheberleri osy týrnırden qanattanǵanyn maqtanyshpen aıtýǵa bolady. Bıylǵy týrnırge qonaq retinde Aleksandr Karelın, Kamandor Madjıdov, Kım En Nam, Jaqsylyq Úshkempirov jáne taǵy da basqa Olımpıada chempıondary qatysady.
Aıtýly týrnırde jeńimpaz dep tanylǵan sportshylarǵa «Halyqaralyq dárejedegi sport sheberi» ataǵy beriledi. Oǵan qosa júzden júırik dep tanylǵan jeńimpazdar men júldegerlerge uıymdastyrýshylar tarapynan qarjylaı qomaqty syıaqy tabystalmaq.
Eske salsaq, Bolat Turlyhanov – Qazaq SSR-nyń eńbek sińirgen jattyqtyrýshysy. Semeı óńirinde dúnıege kelip, 1956 jyly Qazaq dene shynyqtyrý ınstıtýtyn támamdaǵan. Sanaly ǵumyrynda talaı chempıondardy baýlyǵan áıgili bapkerdiń esimi el esinde.
Arman OKTIаBR,
«Egemen Qazaqstan»
ALMATY
