Qazaq-Brıtan tehnıkalyq ýnıversıtetinde ótken dıktant jazýǵa Almatynyń 8 aýdanynan ákimshilik qyzmetkerler, joǵarǵy oqý oryndarynyń, kolledjderdiń oqytýshylary men stýdentteri, mektep muǵalimderi, joǵary synyp oqýshylary jáne medısına salasynyń qyzmetkerleri, t.b. qatysty.
Latyn negizdi qazaq tili álipbıiniń, «Qazaq tili emlesiniń negizgi erejeleri» jobasyn is-ájirıbede jan-jaqty qamtýmen qatar jańa erejege beıimdelýdi maqsat etetin dıktant jazý sharasy tildi jyldam meńgerýge úndeıdi.
Dıktant jazýshylarǵa Halyqaralyq «Qazaq tili» qoǵamynyń prezıdenti, akademık О́mirzaq Aıtbaev sát-sapar tilep, elimizdiń til saıasatynyń mańyzdylyǵyna toqtalyp, barsha qaýymdy tilimizdi damytýǵa shaqyrdy.
Almaty qalasy Tilderdi damytý basqarmasynyń bólim basshysy Baqyt Qalymbettiń aıtýynsha, Almaty qalasy boıynsha jalpyhalyqtyq dıktantqa 120 myń adam qatysady dep josparlanǵan. Dıktant nátıjesinde kimniń qanshalyqty saýatty jazǵandyǵyn anyqtaý basty shart emes. Saýattylyqty tekserý arnaıy belgilengen ólshem-sharttar negizinde anyqtalady.
Iаǵnı, árbir qatysýshy osy kestege oraı ózi jazǵan mátindi ózi tekseredi. Ahmet Baıtursynuly atyndaǵy Tili bilimi ınstıtýty ǵalymdarymen ázirlengen «Jańa álipbı negizindegi qazaq tili emlesiniń erejeleri» jobasynyń áli de talqylynatyndyǵyn jetkizgen Baqyt Qalymbet búgingi sharanyń maqsaty osy jobanyń qanshalyqty júzege asyp jatqandyǵyna zer salý. Eger qazirgi qoldanystaǵy álipbıimizge qatysty syn-eskertpeler bolyp jatsa, onyń barlyǵy da ǵalymdar talqysyna túsedi. Emle erejesimen http://tilalemi.kz saıtynan tanysýǵa bolady.
Dıktant jazýshylar úshin aýdıo mátinde berilgen «Jańa álipbı – jańarýdyń qaınary. Álipbı arqyly ulttyq sana kúsheıedi. Álemde bolyp jatqan jańalyqtar osy jazý arqyly qabyldanady. Sondaı-aq, bul álipbı qazaq tiliniń tól tabıǵatyn saqtaýǵa múmkindik beredi» dep bastalatyn «Rýhanı jańǵyrý» taqyrybynda 77 sóz qamtylǵan.
Dıktant jazý tártibine sáıkes mátin úsh márte qaıtalanyp oqylyp, árbir dybystalýǵa erekshe mán berildi. Qatysýshylar úshin mátindi muqııat tyńdap, jazyp ári tekserýge arnaıy ýaqyt bólindi.
Elvıra Serikqyzy,
«Egemen Qazaqstan»
ALMATY
