Bastaýysh partııa uıymdarynyń qyzmetin jandandyrýdyń tıimdi joldary men tetikterin talqylaý maqsatynda uıymdastyrylǵan forýmnyń ashylýynda «Nur Otan» partııasy Tóraǵasynyń birinshi orynbasary Máýlen Áshimbaev barsha qatysýshylarǵa sáttilik tilep, forýmnyń mańyzyna toqtaldy. «Elbasy bizge partııa qyzmetin júıeli jańǵyrtýdy tapsyrǵanyn bilesizder. Bastaýysh partııa uıymdarynyń tıimdiligin arttyrý – sol jumystyń basty baǵyttarynyń biri. Sondyqtan sońǵy aılarda osy salada aıtarlyqtaı jumystar atqarylyp, Shymkent, Qaraǵandy, Pavlodar jáne Aqtóbe qalalarynda bastaýysh uıymdardyń tórt birdeı aımaqtyq forýmy ótti. Sonyń qorytyndysy retinde búgin respýblıkalyq forýmda bas qosyp otyrmyz. Osyndaı ıgi bastamalar bastaýysh partııa uıymdarynyń jumysyn zaman talaptaryna saı jetildirip, olardyń tıimdiligin arttyra túsetini sózsiz», – dedi M.Áshimbaev.
Sondaı-aq ol forým barysynda aıtylǵan ózekti pikirlerdi árbir nurotandyq tıimdi paıdalaný kerektigine nazar aýdardy. «Búgingi is-sharany tájirıbe almasatyn, tolǵandyryp júrgen saýaldarǵa jaýap alatyn pikir almasý alańy retinde qarastyrǵan abzal. Sondyqtan barshańyzdy ashyq jáne erkin dıalogqa shaqyramyz», – dedi M.Áshimbaev.
Jıynda Qoǵamdyq damý mınıstri Darhan Káletaev elimizde aýyldy jandandyrý maqsatynda arnaıy Jol kartasy ázirlengenin jetkizdi. Sol úshin «Rýhanı jańǵyrý» baǵdarlamasy aıasynda bekitilgen alty baǵytqa jetinshisi qosylyp, «Aýylym – altyn besigim» atty arnaıy baǵyt engizilmek. Sondaı-aq mınıstr aldaǵy «Jastar jylyna» arnalǵan arnaıy Jol kartasy da daıyndalǵanyn atap ótti.
Al Ulttyq ekonomıka mınıstri Tımýr Súleımenov «7-20-25» turǵyn úı baǵdarlamasy boıynsha atqarylyp jatqan jumystarǵa keńinen toqtalyp, forýmǵa qatysýshylardyń saýaldaryna jaýap berdi.
О́z kezeginde Bilim jáne ǵylym vıse-mınıstri Ashat Aıtmaǵambetov Elbasy Joldaýynda aıtylǵan «Pedagog mártebesi týraly» zań aıasynda muǵalimderdiń júktemesi azaıatynyn aıtty. Sondaı-aq ol bes áleýmettik bastamanyń úshinshi baǵyty – qoljetimdi jáne sapaly joǵary bilim men stýdentterdiń jataqhanadaǵy jaǵdaıyn jaqsartý boıynsha qolǵa alynǵan naqty isterge nazar aýdardy.
Jalpy, bastaýysh partııa uıymdary – jergilikti jerlerde partııa saıasaty men onyń strategııalyq mindetterin júzege asyryp, halyqpen jáne árbir nurotandyqpen etene jumys isteıtin partııalyq qurylym. Búginde partııanyń 6 myńǵa jýyq bastaýysh uıymy bar. Sonyń ishinde 1000-nan astam múshesi bar 104 iri bastaýysh uıym tirkelgen. Partııa qyzmetin jańǵyrtý aıasynda júrgizilgen saraptamalar nátıjesinde bastaýysh uıymdardyń partııa fılıaldarymen jáne Ortalyq apparatpen baılanysy júıeli jolǵa qoıylmaǵany, bastaýysh uıymdar deńgeıinde júzege asyrylatyn naqty jobalardyń bolmaýy, olardy qarjylaı qoldaýdyń retsizdigi jáne materıaldyq-tehnıkalyq jabdyqtalýynyń kóńil kónshitpeıtini sııaqty birqatar ózekti máseleler anyqtalǵan. Osy túıtkilderdi tıimdi sheshý joldary Bastaýysh partııa uıymdarynyń jumysyn jandandyrý tujyrymdamasynda aıqyn kórsetilgen.
Forým delegattary atalǵan tujyrymdamada qamtylǵan máselelerdi paneldi sessııalarda keńinen talqylady. Máselen, «Partııaishilik menedjment» sessııasynda qatysýshylar partııa jumysyndaǵy zamanaýı tehnologııalar, sonyń ishinde ishki bıznes úderisterin avtomattandyrý, E-Analıtıka júıesin engizý, jobalyq tásil jáne bastaýysh uıymdardyń óz jobalaryn júzege asyrý sııaqty partııa qyzmetin jandandyratyn utymdy tustardy qarastyrdy. Osy másele jóninde sheteldik sarapshy, Túrkııanyń Ádilet jáne damý partııasynyń Shyǵys Anadoly óńirindegi úılestirýshisi Mahmut Samı Mally keńinen sóz qozǵap, sheteldik tájirıbege toqtaldy. Kelesi sessııada qatysýshylar partııanyń kadrlyq rezervin qalyptastyrýdaǵy jańa ádis-tásilderge nazar aýdardy. Bul sessııada Reseıdiń «Edınaıa Rossııa» partııasynyń departament basshysy N.Fınko kadrlyq rezerv qalyptastyrýdyń halyqaralyq tájirıbesine nazar aýdardy.
«Tıimdi kommýnıkasııa» dep atalǵan úshinshi sessııada delegattar partııa jaqtastaryn ortaq maqsattarǵa jumyldyrý, qoǵamdyq pikirlerge baılanysty áreket etý, qoǵamdyq kún tártibin qalyptastyrý sııaqty partııa jumysyndaǵy bazalyq mindetterdi júzege asyrý kezindegi zamanaýı kommýnıkasııanyń róli jaıynda pikir almasty. Sondaı-aq qatysýshylar ýkraınalyq saıasattanýshy Vsevolod Zelenınniń pikirlerin tyńdap, óz saýaldaryna jaýap aldy.
Paneldi sessııa kezinde bastaýysh uıymdardyń jumys tıimdiliginiń kórsetkishteri de jan-jaqty talqylanyp, qatysýshylar ózara baılanys, qarjylandyrý, jergilikti jerdegi máselelerdi der kezinde anyqtaý sııaqty birqatar basymdyqtar boıynsha óz pikirlerin bildirdi. Al bul jıynda sheteldik tájirıbe jóninde Ulybrıtanııanyń saıası konsaltıng baǵytynda qyzmet kórsetetin CSM kompanııasynyń atqarýshy dırektory, Halyqaralyq saıası konsýltant qaýymdastyǵy dırektorlar keńesiniń múshesi R.Merfı aıtyp berdi.
Respýblıkalyq forým búgin óz jumysyn jalǵastyrady.
Joldybaı BAZAR,
«Egemen Qazaqstan»
