Árıne, bázbir batyr babalarymyz Kýtýzov áskerimen birge baryp Senadan at sýarǵan, Ámire men Mustafadaı Alash arystarynyń izi qalǵan qasıetti qalanyń áıgili Áýbákirovaǵa da jattyǵy joq. Munda ol buǵan deıin de birneshe ret at basyn burǵan. Belgili pıanınoshy osy elde ótken halyqaralyq Margaret Long jáne Jak Tıbo konkýrsynda 1983 jyly Gran-prıdi jeńip alǵan. Fransııanyń óner jáne ádebıetiniń ordenimen marapattalǵan.
Otyz jyldan bergi shyǵarmashylyq jolynda shyrqaý bıikterge shyǵyp, kórermen kózaıymyna aınalǵan Jánııa Jaqııaqyzy Parıjdiń Korto zalyna jalǵyz kelmepti. Kil sańlaqtar samǵaǵan kıeli sahnaǵa búginde Eýropada bilim alyp, jumys istep júrgen daryndy qazaqstandyq jastardy shyǵaryp, talǵampaz kópshilikke tanystyrdy. Atap aıtqanda, qazirdiń ózinde bedeldi báıgelerdi qanjyǵalaryna baılap úlgergen skrıpkashy Erjan Kúlibaev, vıolonchelshi Sánııa Dúrkeeva, akkardeonshy Roman Iýsııpeı álem áspettegen uly klassıkterdiń, sondaı-aq zamanaýı zańǵar kompozıtorlardyń shyǵarmalaryn shyraıyn shyǵaryp oryndady.
Qazaqstandyq mýzykanttardyń qabilet qarymyna qaıran qalǵan, fransýzdar qoshemetpen qol soqty. «Ǵajap! Ǵalamat oryndaý sheberligine tántimiz. Bahtyń horalyn pıanıno men akkardeonnyń súıemeldeýimen oryndalǵanyn buryn-sońdy kórmegen edik. Keremet» desken kórermen tańdanysy bizdiń mádenıetimizdiń mereıin bir ósirip tastaǵany talassyz.
Osyǵan oraı qýanyshyn jasyra almaǵan dara daryn ıeleriniń biri Sánııa Dúrkeeva keıingi izbasarlaryn qanatynyń astyna alyp, qamqorlyq tanytýshy Jánııa Áýbákirovanyń atyna alǵys sezimin bildirdi. «Ol áıgili ártis qana emes, ulaǵatty ustaz da. Osy kisilerdeı korıfeıleri bar ulttyq ónerimizdiń kóshi qashanda kórikti bolmaq», dedi ol oıyn túıindep.
Qazaqtyń qadirli qyzynyń eýropalyq týry buıyrsa, endi Aýstrııa, Germanııa jáne Polsha astanalarynda jalǵaspaq.
Talǵat BATYRHAN,
«Egemen Qazaqstan»
