Halyqaralyq deńgeıde ótken jıynǵa «Nevada-Semeı» halyqaralyq antııadrolyq qozǵalysynyń tóraǵasy, aqyn Oljas Súleımenov qatysty. Forýmda sóz alǵan mártebeli meıman Qazaqstandaǵy antııadrolyq qozǵalystyń bastalýyna 1989 jyldyń 19 qazanynda Qaraǵandy kenshileriniń jappaı ereýilge shyǵýy muryndyq bolǵanyn atap ótti. «Endi, mine, 30 jyl burynǵydaı Qaraǵandy, QarMTÝ ózge oblystardyń ishinde alǵashqy bolyp, bul forýmdy uıymdastyryp otyr», dedi O.Súleımenov.
Antııadrolyq qozǵalystyń belsendisi, ATOM jobasynyń qurmetti elshisi, sýretshi Káripbek Kúıikov ótken kúnderdi eske alyp, óziniń týǵan jerinde jasalǵan synaq jarylystarynan qarapaıym halyqtyń qandaı zardap shekkenin aıtty. «Ondaǵan jyldar boıy jasalyp kelgen ıadrolyq synaqtar qazir tyıylsa da, adamdar áli kúnge deıin jarylystardyń zardaptaryn oılap, qatty ýaıymdaıdy», dedi ol. Sóziniń aıaǵynda ol búgingi jastardyń estafetany qolǵa nyq alyp, aǵa býyn ókilderi bastaǵan isti laıyqty jalǵastyraryna senim bildirdi.
Jıyn barysynda sondaı-aq Táýelsiz Qazaqstannyń tuńǵysh Syrtqy ister mınıstri, saıası ǵylymdar doktory, Qazaqstan Prezıdenti janyndaǵy Memlekettik basqarý akademııasynyń professory T.Súleımenov, Pavlodardaǵy «Samal» saýyqtyrý ortalyǵynyń dırektory Z.Bagnenko jáne basqalar mazmundy baıandama jasady.
Qaırat ÁBILDA,
«Egemen Qazaqstan»
QARAǴANDY
