Polısııa maıory Elena Maǵasýmovanyń aıtýynsha, «Qaýipsiz jol» sharasy jop apatynyń aldyn alýdy ǵana emes, júrgizýshilerdiń, avtoáýesqoılarynyń jol qozǵalysy mádenıetin kóterýdi de maqsat tutypty.
«Jyl basynan beri júrginshilerdiń de qatysýymen óńirdegi qalalarda 141 jol-kólik oqıǵasy oryn aldy, odan 19 adam qaza bolyp, 129 adam jaraqat aldy. Statıstıka boıynsha, qaladaǵy árbir ekinshi jol-kólik oqıǵasy júrginshilerdiń qatysýymen oryn alady. Jol apaty kóbine júrginshiler kóp júretin, rettelmeıtin burylystarda bolady. Al mundaı jerderlerde júrgizýshilerge óte abaı bolý kerek» deıdi Elena Maǵasýmova.
Polıseıler kóligin aqyryn júrgizip, abaılap ótetin júrgizýshilerdi Qostanaı qalasyndaǵy eń qaýipti degen Altynsarın jáne Tolstoı kósheleriniń burylysynda turyp marapattady. Olarǵa jol qozǵalysy erejeleri jazylǵan býkletter tapsyrdy.
«Men úshin bul kútpegen syı boldy. Men onshaqty jyldan beri kólik júrgizemin, qazir «Folksvagen» mashınasyn aıdaımyn. Men qalanyń tar kóshelerinde erejeni aıyryqsha saqtaýǵa, júrginshilerdi aldymen ótkizip jiberýge tyrysamyn. Erejeni saqtaý, sypaıy bolý – ár júrgizýshiniń mindeti, boryshy. Rýlde otyryp, uqypty bolmaýdyń sońy orny tolmas ókinishterge uryndyrýy múmkin, sony árkim túsinýi tıis» deıdi júrgizýshi Erik Esmaǵanbetov.
Názıra Járimbet,
«Egemen Qazaqstan»
Qostanaı
