Elbasy óziniń quttyqtaý sózinde «Nur Otan» partııasynyń 20 jyldyq mereıli belesine oraı ótkizilip otyrǵan Bastaýysh partııa uıymdary I forýmynyń ashylýymen quttyqtap, bul aıtýly oqıǵa partııanyń eń basty resýrsy onyń músheleri, ıaǵnı Otanymyzdyń damýyna, órkendep, gúldene túsýine eleýli úles qosyp kele jatqan qoǵamnyń eń belsendi ári jaýapty ókilderi ekenin kórsetetinin atap ótken.
«Búginde bizdiń aldymyzda Qazaqstandy álemdegi básekege qabiletti 30 memlekettiń qataryna engizetin jańa damý modelin qalyptastyrý mindeti tur. Men bıylǵy Joldaýymda elimizdiń damý deńgeıi árbir azamatymyzdyń ál-aýqatymen ólshenetinin atap óttim. «Nur Otan» partııasy jetekshi saıası kúsh retinde damýdyń lokomotıvi bolyp qana qoımaı, sonymen birge ár qazaqstandyqtyń memlekettiń áleýmettik saıasatynyń ıgiligin sezinýiniń kepili de bolýy tıis. Bul maqsattarǵa qol jetkizý úshin partııamyzdyń ózi de jetilip, zamanaýı úrdister men talaptarǵa saı jumys isteýge beıimdelgeni jón», delingen Memleket basshysynyń quttyqtaý hatynda.
Sondaı-aq partııa Tóraǵasy Saıası keńestiń bıylǵy maýsym aıyndaǵy keńeıtilgen otyrysynda partııanyń júıeli jańǵyrý úderisi bastalǵanyna jáne onyń basty baǵyttarynyń biri – bastaýysh partııa uıymdarynyń jumysyn jandandyrý ekenine nazar aýdarǵan.
«Búgingi basqosý partııa qyzmetine tyń serpin berip, jumys tásilderin jetildirý jolyndaǵy mańyzdy qadam bolady dep senemin. Tájirıbesi mol jergilikti saıası kóshbasshylar jetekshilik etip otyrǵan bastaýysh partııa uıymdary – kadrlyq rezervti qalyptastyrýdyń negizgi kózi. Olar sondaı-aq azamattarmen jáne qoǵamdyq uıymdarmen yqpaldastyq ornatýdyń da mańyzdy býyny bolýy tıis. Partııamyzdyń aldynda turǵan jańǵyrý úderisin tabysty júzege asyrý – sizderdiń kúsh-jigerlerińizge tikeleı baılanysty. Barshańyzǵa el ıgiligi men halqymyzdyń ál-aýqatyn arttyrý jolynda jańa jetistikter tileımin», – delingen Elbasynyń quttyqtaýynda.
Jıynda atalǵan forým partııanyń 20 jyldyǵyna arnalǵan sharalardyń basy ekeni de aıtyldy.
– О́zderińizge belgili, kelesi jyly partııamyzdyń mereıtoıyn atap ótemiz. Osy jyldar ishinde bizdiń partııamyz elimizdegi jetekshi saıası uıym retinde qalyptasý jolynan súrinbeı ótti. Partııa negizi qalanǵan kúnnen bastap ekonomıkalyq, áleýmettik jáne saıası saladaǵy Elbasy saıasatynyń basty ári negizgi oryndaýshysy bolyp keledi. Sodan beri biz barsha qazaqstandyqtardy Prezıdent reformalaryn qoldaýǵa jumyldyryp, aýqymdy jumystardy atqardyq dep aıtýǵa tolyq negiz bar. Bul iste bastaýysh uıymdarymyzdyń mańyzy zor, – dedi M.Áshimbaev.
Búginde «Nur Otannyń» 17 aımaqtyq jáne 230 aýmaqtyq fılıaly men 6 myńǵa jýyq bastaýysh partııa uıymy bar.
«Nur Otan» partııasy Tóraǵasynyń birinshi orynbasary jahandyq syn-qaterlerge laıyqty tótep berý maqsatynda Elbasy naqty maqsat-mindetterdi aıqyndap bergenin, olardy nátıjeli júzege asyrý úshin aldymen partııanyń ózi HHI ǵasyrdyń barlyq talaptaryna saı, tıimdi, joǵary tehnologııaly, ınnovasııaǵa beıim, básekege qabiletti saıası uıym bolýy tıis ekenin jetkizdi. Sondaı-aq ol osy maqsatta qolǵa alynǵan partııa qyzmetin jańǵyrtý bastamasynyń alǵashqy nátıjelerine nazar aýdardy. О́tken maýsym aıynda bastaý alǵan partııalyq jańǵyrý aıasynda búginde elimizde jastarymyzdyń baǵdarlamalaý, robot tehnıkasy, 3D-modeldeý negizderin jetik meńgerip, osy salada tereń bilim alýyna múmkindik beretin 761 IT-synyp ashylyp, onda 22 myńnan astam mektep oqýshysy bilim alýda. Odan bólek, partııanyń bastamasymen elimiz boıynsha 24 IT-ortalyq ashylyp, onda 1600-den astam azamat jańa tehnologııalar boıynsha bilim aldy. Basqa partııalyq jobalar boıynsha da aıtarlyqtaı naqty nátıjelerge qol jetkizilgen. Máselen, el kóleminde mektep janyndaǵy 47 sport alańy jańartylyp, qaıta jabdyqtaldy. Kitaphanalar bazasynda 120-ǵa jýyq zamanaýı bilim ortalyǵy ashyldy. Sonyń ishinde aýyldyq jerlerdegi kitaphanalardy da erekshe atap ótken jón.
– Bul jobalardyń bári – Elbasymyzdyń ıntellektýaldy, deni saý jáne básekege qabiletti ult qalyptastyrý jolyndaǵy ıgi bastamalarynyń laıyqty jalǵasy jáne ajyramas bir bóligi, – dedi M.Áshimbaev.
Partııa Tóraǵasynyń birinshi orynbasary uıymnyń Ortalyq apparaty men barlyq fılıaldarynyń jáne bastaýysh partııa uıymdarynyń aldynda turǵan basym baǵyttarǵa toqtalyp ótti.
– Birinshiden, Elbasy Joldaýynyń strategııalyq mańyzyn eskere otyryp, «Nur Otan» partııasy onyń tıimdi júzege asyrylýyn qamtamasyz etetin negizgi kúshke aınalýy tıis. Osy baǵytta qoǵamdyq baqylaý jumystaryn kúsheıtip, onyń máni men mańyzyn ár qazaqstandyqqa jetkizýde belsendi áreket etýimiz kerek. Ekinshiden, partııanyń kadrlyq áleýetin arttyrý úshin bastaýysh uıymdardyń belsendi músheleri men kóshbasshylarynyń biliktiligin molynan paıdalanýymyz kerek. Partııanyń kadrlyq rezervin qalyptastyrýda osy máseleni mindetti túrde eskergen jón. Úshinshiden, bastaýysh uıymdarymyzdyń halyqpen jumys tıimdiligin odan ári arttyrý qajet. Ol úshin jetekshilerdiń ózderi saıası tájirıbege baı, ıdeologııa, menedjment, psıhologııa sııaqty salalarda saýatty bolýy tıis. Tórtinshiden, bastaýysh partııa uıymdarynyń materıaldyq-tehnıkalyq bazasyn kúsheıtý kerek. Besinshiden, partııa jumysynda sıfrly tehnologııalardy keńinen qoldanyp, «Sıfrly partııa» jobasyn júzege asyrýda belsendi áreket etýge tıispiz. Altynshydan, belsendi azamattar men jastardy jumyldyrý arqyly partııa jumysyn kúsheıtýdiń mańyzy zor, – dedi Máýlen Áshimbaev.
Erekshe atap óter jaıt, Elbasy – partııa Tóraǵasynyń bastamasymen budan bylaı bastaýysh partııa uıymdarynyń forýmy dástúrge aınalyp, eki jylda bir ret ótkizilip turatyn boldy. Bul partııa jumysyna qatysty kez kelgen máseleni talqylap, pikir almasýǵa múmkindik beretin jańa alań bolmaq.
Barlyq usynystar jıyn kezinde qatysýshylar tarapynan qoldaý tapqan Bastaýysh partııa uıymdarynyń qyzmetin jandandyrý tujyrymdamasynda eskeriletin bolady. Atalǵan qujatta bastaýysh uıymdardyń jumysyn jetildirý, sapaly partııalyq aktıv pen kásibı kadrlyq rezerv qalyptastyrý, ózekti máselelerdi anyqtaý tehnologııalary men olardy sheshýdiń tıimdi tetikteri, sıfrly tehnologııalar men aqparattyq-kommýnıkasııalyq jumysty jandandyrý jáne bastaýysh uıymdardyń basqarý júıesinde jańa jumys formattaryn engizýdiń utymdy joldary aıqyn kórsetilgen.
Jıyn sońynda «Úzdik bastaýysh partııa uıymdary» respýblıkalyq baıqaýynyń jeńimpazdary men júldegerleri marapattaldy.
Joldybaı BAZAR,
«Egemen Qazaqstan»
