Eki jylda bir ret ótkiziletin aıtýly festıvalge bıyl О́skemenniń óz teatrlarynan bólek, Astana, Almaty, Qaraǵandy, Petropavl, Pavlodar, Semeı qalalary men Túrkistan oblysynyń Jetisaı teatrynan barlyǵy 9 óner ujymy qatysyp, baq synady. Ár teatrdyń ákelgen spektaklderi taqyryptyq qana emes, janrlyq, mazmundyq hám formalyq turǵyda san alýan. Úsh kún boıy qala turǵyndary men qonaqtary saf ónermen sýsyndady, festıvalge qatysýshy teatrlar tájirıbe almasyp, jańa týyndylaryn talǵamy joǵary ónersúıer qaýym – kásibı teatr synshylary men kózi qaraqty kórermen nazaryna usyndy.
Festıval qorytyndysy boıynsha, júzden júırik, myńnan tulpar shyqqan úzdik qoıylymdar arnaýly atalymdar boıynsha marapattaldy. Qazylar alqasynyń sheshimimen, bas júlde – Gran Prı rejısser Batyrbek Shambetov qoıǵan Maǵjan Jumabaevtyń «Sholpannyń kúnási» dramasy úshin S. Muqanov atyndaǵy qazaq sazdy drama teatrynyń enshisine buıyrdy.
Al Rústem Esdáýletov atyndaǵy arnaıy syılyq Almaty qalasy Memlekettik qýyrshaq teatrynyń «Medeıa» (Evrıpıd) spektakline jáne «Úzdik rejıssýra» atalymyndaǵy júlde atalǵan qoıylymnyń rejısseri Aıdyn Salbanovqa tabystaldy. Astana qalasy ákimdiginiń M.Gorkıı atyndaǵy memlekettik akademııalyq orys drama teatrynyń akteri Sergeı Matveev «Naedıne s Pýshkınym» monospektaklindegi izdenisi úshin «Festıvaldiń úzdik akteri» atansa, B.Omarov atyndaǵy «Jas sahna» teatry usynǵan E.Shmıttiń «Moı malenkıı Oskar» qoıylymyndaǵy Oskar róli úshin Marıanna Pokrovskaıa «Festıvaldiń úzdik aktrısasy» atalymynda top jardy.
«Ekinshi plandaǵy er adam roli» Astana qalasynyń Jastar teatry atynan qatysqan «Tasbaqa úmit» (N. Kolıada) qoıylymyndaǵy Tasbaqa róli úshin Beıbit Qusanbaevqa, al «Ekinshi plandaǵy áıel adam róli» atalymyndaǵy júlde J.Aımaýytov atyndaǵy Pavlodar oblystyq qazaq mýzykalyq drama teatrynyń «Ataý kere» (O. Bókeı) dramasyndaǵy Núrke roli úshin Roza Tájibaevaǵa tabys etildi. «Kórermen kózaıymy» atalymynda S. Seıfýllın atyndaǵy Qaraǵandy oblystyq qazaq drama teatrynyń aktrısalary: «Qaıran jas dáýren» qoıylymyndaǵy R. Pesochınskaıa roli úshin Gúlsara Rashqalıeva, Voronkova roli úshin Bıjamal Kemalova jáne Barabanova roli úshin Nurjibek Jansúgirova marapattalady. Sonymen qatar Sh.Aıtmatovtyń «Jámılá» spektaklindegi Seıit roli úshin Q.Jandarbekov atyndaǵy Jetisaı drama teatrynyń akteri Saǵıtjan Arıphanov «Úmit», al Semeı qalasy F. Dostoevskıı atyndaǵy memlekettik orys drama teatrynyń «Nıotkýda s lıýbovıý» qoıylymy «Shyǵarmashylyq izdenis» nomınasııasyna ıe boldy.
Nazerke JUMABAI,
«Egemen Qazaqstan»
