Osymen úshinshi ret ótkizilip otyrǵan forýmǵa Parlament depýtattary, Prezıdent Ákimshiliginiń, Úkimettiń, ortalyq memlekettik organdardyń, bıznes-qaýymdastyǵynyń ókilderi qatysty. Is-sharanyń betasharynda Bas prokýror Qaırat Qojamjarov Memleket basshysynyń bıznesti zańsyz ákimshilik qysym men qylmystyq qýdalaýdan qorǵaý jónindegi tapsyrmalaryna oraı qabyldanyp jatqan sharalar barysyna toqtaldy. Q.Qojamjarov prokýratýra tarapynan «Atameken» UKP-men birlese otyryp negizgi baǵyttar boıynsha 200-ge jýyq shara oryndalǵanyn atap ótti.
Bas prokýrordyń aıtýynsha, kásipkerlerdi zańsyz tekserý sońǵy birneshe jyl ishinde bir jarym esege azaıǵan. 2015 jyly tekserýler sany 1270-ke, 2016 jyly – 993-ke, 2017 jyly – 979-ǵa, bıyl 10 aıda 747-ge tómendepti.
Bızneske zańsyz aralasqysy keletinderdiń jolyn kesý úshin prokýratýra organdary tekserýdiń avtomattandyrylǵan aqparattyq júıesin iske qosqan. Tekserý sýbektileri men obektileriniń biryńǵaı reestri dep atalatyn júıe baqylaý sýbektisin adamdardyń qatysýynsyz, derbes anyqtaıdy eken.
– Qýdalaýdy azaıtý, kásipkerlerdi qylmystyq proseske negizsiz tartýǵa jol bermeý maqsatynda ekonomıkalyq qylmystardy izgilendirýdiń eki kezeńi júrgizildi. 23-bap boıynsha qylmystyq jazalardyń kólemi azaıtylyp, oǵan balama túrler engizildi, – deıdi Bas prokýror.
Bıznes sýbektilerin sotqa deıin qamaýǵa alýǵa tyıym salý, keltirilgen zalaldy ótegen jaǵdaıda kásipkerlerdi qylmystyq jaýapkershilikten bosatý syndy joldardyń qarastyrylǵany jaqsy nátıje bergeni baıqaldy. Bul ózgeristiń arqasynda ekonomıkalyq qylmystarǵa qatysty tergeý-tekserý isteriniń aýqymy 5 esege azaıǵany sony kórsetedi.
«Atameken» UKP Tóralqasynyń tóraǵasy Tımýr Qulybaev atap ótkendeı, Ulttyq kásipkerler palatasy kásipkerlerdiń quqyqtary men zańdy múddelerin qorǵaýǵa erekshe basymdyq beredi. Bas prokýratýramen birlese otyryp, sońǵy jyldary elimiz boıynsha kásipkerlerge qoldaý kórsetý júıesin qolǵa alǵany osynyń belgisi.
«Atameken» UKP Tóralqasy tóraǵasynyń aıtýynsha, úsh jyl buryn kásipkerlerdiń ústinen 9 myńǵa tarta qylmystyq is qozǵalsa, bul kórsetkish 2017 jyly 1800-den sál asqan. Iаǵnı kórsetkish 5 esege deıin azaıdy degen sóz. Bul 20 myńnan astam kásipkerdiń óz isin odan ári jalǵastyrýyna, jumys oryndarynyń saqtalýyna jol ashty. Sol arqyly el ekonomıkasynyń damýyna oń yqpal jasaldy deýge negiz bar.
T.Qulybaev atap ótkendeı, qazirgi tańda baqylaýshy organdar kásiporyndardy jazalamas buryn, aldymen olarǵa jiberilgen buzýshylyqtardy joıý týraly eskertý jasaıdy. Bıznesmender jiberilgen kemshilikti joımaǵan jaǵdaıda ǵana jaýapqa tartylady.
– Ákimshilik zańnamalardy qaıta qaraýǵa keler bolsaq, bızneske qatysty baptardyń 80 paıyzyna ózgerister engizildi, aıyppuldardyń kólemi 30 paıyzǵa tómendedi, salynǵan aıyppuldy 50 paıyzdyq jeńildikpen tóleýge bolady, 50-bapqa eskertý jasaý týraly ózgeris engizildi, – dep atap ótti ol.
T.Qulybaev forým barysynda memlekettik baqylaý júıesiniń sapasyna toqtalyp ótti.
– Baqylaý zań buzýshylarǵa baǵyttalýǵa, al adal bıznesti negizsiz tekseristerden bosatýy tıis, osyndaı tekserý júıesin qurý kerek. Alty salada júrgizilgen taldaý nátıjesi kemshilikterdiń bar ekenin kórsetti. Atap aıtqanda, birde-bir memlekettik organ táýekelderdi basqarý júıesin tolyqtaı qaıta qaraýǵa, durys ındıkatorlar engizýge tyryspaıdy. Osyǵan baılanysty «Atameken» barlyq memlekettik organdardyń derekter bazasymen biriktirilgen ortaq bıznes-reestr qurýdy usynady, – dedi ol.
Forým qorytyndysy boıynsha jańa Jol kartasy bekitildi. Onda básekelestikti jáne memlekettik-jekeshelik áriptestigin odan ári damytýǵa qatysty keshendi is-sharalar, sondaı-aq ekologııa, eńbek, jer, veterınarııa salalaryndaǵy quzyrly organdardyń tekseris talaptaryn qaıta qarastyrý qamtylady dep kútilýde.
Arnur ASQAR,
«Egemen Qazaqstan»
