Myń oryndyq eki mal bordaqylaý alańy salynady
«Jospar kóp. Mańaıdaǵy mektepterdi taza, ekologııalyq ónimdermen qamtamasyz etý úshin sút taýarly fermalaryn ashyp, janynan shaǵyn sehtar quryp, pasterlengen sút, maı, irimshik shyǵarsaq pa deımiz. Kooperatıv jumystaryn jandandyrý da oıymyzda bar. Jasyratyny joq, qazir eshkim mal baqqysy kelmeıdi, qoıa beredi. Biz turǵyndarǵa: «Kooperatıv ashamyz, maldyń bárin sonda qosasyzdar. Sútti saýasyzdar, kooperatıv tóraǵasyna ótkizesizder. Aqshalaryńyzdy kúndelikti tólep otyrady» dep túsindirip jatyrmyz. Negizi aýdannyń barlyq aýyldyq okrýgterinde kooperatıvter ashylǵan. Biraq jumystary durys júrmeı tur. Kelesi jyly Abaı men Býrabaı aýyldarynda myń basqa arnalǵan eki mal bordaqylaý alańyn ashýdy josparlap otyrmyz. Durys, tıimdi paıdalanbaıtyn jerlerdi memleketke qaıtaryp, ol jerlerdi sút taýarly fermalaryn ashýǵa, bordaqylaý alańdaryn salýǵa bersek deımiz», - deıdi Kúrshim aýdanynyń ákimi Dýlat Qajanov.
Sonymen qatar aýdandaǵy derbes bıýdjetke ıe bolǵan 5 aýyldyq okrýgke 10 mıllıon teńgeden qarajat bólý, Marqakól kóli janyndaǵy Uranqaı aýylyna 6 gektar jerge 1 mıllıard teńgege demalys bazasyn salý josparlanyp otyrǵan kórinedi. Bul jobany jeke kásipkerler júzege asyrmaq. Jaqynda aýdan ákimdigimen memorandým jasasypty. Dýlat Zaısanbekuly Kúrshimde 60 páterli úı salý boıynsha jobalyq-smetalyq qujat daıyndalǵanyn, saraptamasyn kútip otyrǵanyn jetkizdi. Kúrshim men Marqakól aýyldarynyń káriz júıelerin jóndeý úshin jobalyq-smetalyq qujattar ázirlenipti. Maraldy aýylynyń sý qubyryn jóndeý de josparǵa enipti. Jalpy, búginde Kúrshim aýdanynyń aýyz sýmen qamtylýy 60 prosentti quraıdy. «Aýdandaǵy ózekti máseleniń biri – Mádenıet úıleriniń jaǵdaıy. Aýdandaǵy 10-ǵa jýyq Mádenıet úıi jóndeýdi qajet etedi. Materıaldyq-tehnıkalyq bazasy nashar. Osy máselege kóńil bólý kerek», - deıdi D.Qajanov.
Maqsatymyz – halyq sanyn kóbeıtý
Tumsa tabıǵaty, tuma bulaqtary, tunyq kóli bar Marqakól búginde Kúrshim aýdanyna qaraıtyny belgili. Marqakól Kúrshimge qosylǵanda eki aýdannyń halqy 50 myń bolǵan eken. Qazir qalǵany – 25 myń. «Arnaıy saraptama jasadym. Aýdannyń eń úlken máselesi – osy. Jalpy, aýdanda másele kóp qoı. Sý, jol, baılanys degendeı. Biraq ol máselelerdi sheshýge bolady. Al halyqtyń sanyn kóbeıtý qıyn másele. Qazir osy 25 myń halyqtan 6 mıllıon, 559 myń teńge salyq túsedi. Iаǵnı, óz tabysymyz. Bul jalaqy berýge, aýdannyń jyrtyqtaryn jamaýǵa ǵana jetedi. Biz aldaǵy ýaqytta óz tabysymyzdy mıllıardqa jetkizsek deımiz. Buǵan halyqtyń sany ulǵaıtý esebinen ǵana jete alamyz. Halyq jumys istese, salyq ta túsedi. Sondyqtan biz aýdan qosylǵan kezdegi 50 myńǵa jetkizbesek te, halyq sanyn kóbeıtý baǵytynda jumys isteıtin bolamyz. Máselen, Qalǵuty aýyldyq okrýginde 300 áıel adam bar. Sonyń densaýlyǵy jaramsyz, balaǵa kótere almaıdy degen 100-in alyp tastap, 200-in esepke alǵanda jylyna tek 10 bala ǵana dúnıege keledi eken. Demek, tabıǵı ósim joq. Halyq sanyn arttyrý úshin Ońtústik oblystarmen jumys isteımiz. Jumys istep te jatyrmyz. О́kilderimizdi de jiberdik. Biz óz tarapymyzdan Ońtústikten keletin turǵyndardy qabyldaýǵa daıynbyz. Sýarmaly jerler bar. Bir ótinish, Ońtústiktiń ákimdikteri osy máselege durystap den qoısa, turǵyndardy jiberýge jiti nazar aýdarsa deımiz», - degen aýdan ákimi jaqynda jerlester forýmyn ótkizip, demograf ǵalymdardy da qosa shaqyryp, aýdan halqynyń sanyn kóbeıtý joldaryn birlese aqyldasýdy uıǵaryp otyrǵandaryn jetkizdi.
Azamat QASYM,
«Egemen Qazaqstan»
Shyǵys Qazaqstan oblysy,
Kúrshim aýdany
