Kezdesýde A.Sergeev Qazaqstan halqynyń ystyq yqylasyna rızashylyǵyn jetkizdi.
«L.N.Gýmılev atyndaǵy Eýrazııa ulttyq ýnıversıtetinde stýdentterge dáris oqyp, atalǵan oqý ordasynyń qurmetti professory atandym. Bul – men úshin baqyt. Keleli kezdesýlermen bastalǵan bul saparym tolaıym tabystarǵa toly bolaryna senimdimin. Eki el arasynda ǵylym salasyna baılanysty barlyq tıisti qujatqa qol qoıylyp, eki jaqtyń ǵalymdary birigip atqaratyn biregeı jobalardy bekitkennen keıin ony el nazaryna usynatyn bolamyz. Eger jalpylama qaraıtyn bolsaq, qos memlekettiń de ǵylymy eldiń ekonomıkasyn ilgeriletýge úles qosyp keledi. Reseıde 2 jyl buryn memlekettiń ǵylymı-tehnıkalyq damýynyń strategııasy qabyldandy. Bul naryqqa shyǵatyn ónimniń negizgi qurylymyn, zııany men paıdasyn jan-jaqty zertteýge múmkindik beredi. L.N.Gýmılev atyndaǵy Eýrazııa ulttyq ýnıversıtetine barǵanymda Qazaqstan ǵylymynyń qaryshtap damyp kele jatqanyna kóz jetkizdim. Bilimge qushtar stýdentterdi kórip, ǵylymnyń keleshegi jarqyn bolaryna senimim bekı tústi», dedi Reseı ǵylym akademııasynyń prezıdenti A.Sergeev.
Qazaqstan Ulttyq ǵylym akademııasynyń prezıdenti M.Jurynov Reseı ǵylym akademııasynyń ujymymen jáne reseılik ǵalymdarmen ejelden etene baılanys ornatylǵanyn aıtty. Sondaı-aq ǵylym salasyndaǵy túıtkildi máselelerdi buǵan deıin álemdik aýqymdy aýdıtorııalarda talqyǵa salyp júrgendikterin tilge tıek etip, bul jumystar ári qaraı da jalǵasyn tabatynyn jetkizdi.
Raýan QAIDAR,
«Egemen Qazaqstan»
