Is-sharaǵa Prezıdent Ákimshiliginiń, Joǵarǵy sottyń, quqyq qorǵaý organdarynyń basshylary, Parlament depýtattary, EQYU/DIAQB, EYDU jáne Eýropa Keńesi Venesııa komıssııasynyń sarapshylary, sondaı-aq úkimettik emes quqyq qorǵaý uıymdarynyń ókilderi men jaqyn jáne alys shetelderdiń ǵalymdary qatysty.
Quttyqtaý sózinde Q.Mámı quqyqtyq memlekettiń ajyraǵysyz erekshe belgileriniń biri táýelsiz sot bıligi ekenin atap ótti. Osy jyldar ishinde sot júıesin reformalaý eldiń Konstıtýsııasy men baǵdarlamalyq qujattaryna sáıkes júrgizildi.
2001 jyldan bastap Qazaqstan TMD keńistiginde sýdıalardy konkýrs arqyly taǵaıyndaý rásimin alǵashqy bolyp engizdi. 2016 jyly Konstıtýsııaǵa buryn qabyldanǵan túzetýlerge sáıkes Joǵary Sot Keńesiniń mártebesi kóterilip, onyń músheligi men ókilettikteri keńeıtildi.
– Qazaqstanda qabyldanǵan keshendi sharalar nátıjesinde memlekettik bıliktiń adam quqyqtary men bostandyqtaryn qorǵaıtyn derbes jáne senimdi sot tarmaǵy qalyptasty. Ol laıyqty sýdıalar korpýsyn qalyptastyrýǵa jáne onyń quramyna kezdeısoq adamdardyń kirý yqtımaldylyǵyn barynsha azaıtýǵa yqpal etti, – dedi Q.Mámı.
Sonymen birge qazirgi zamanǵy syn-qaterler sot qoǵamdastyǵy aldynda jańa mindetter qoıýda. Bul úzdiksiz proseste belgilengen reformalardyń júıeliligin saqtaǵan mańyzdy.
Osyǵan baılanysty Joǵary Sot Keńesiniń quramyn sýdıalar men zań qoǵamdastyǵynyń ókilderiniń esebinen odan ári keńeıtý oıǵa qonymdy.
Halyqaralyq standarttardyń negizgi talaptary – osyndaı mekemelerdiń quramynda ártúrli ınstansııalardyń sýdıalary basym bolýǵa tıis.
– Sýdıalardy irikteý moraldyq qasıetteri men kásibı biliktiligine baılanysty obektıvti jáne ashyq ólshemsharttar negizinde júrgizilýge tıis, – dep qorytyndylady sózin Konstıtýsııalyq Keńes Tóraǵasy.
