Oblystyq densaýlyq saqtaý basqarmasynyń basshysy Mánshúk Aımurzıevanyń aıtýynsha, atyraýlyqtardyń ortasha ómir súrý uzaqtyǵy − 73,2 jas. Bıylǵy on aıda ólim kórsetkishi 2,1 paıyzǵa ósken, ásirese sábı ólimi 23 paıyzǵa deıin kóterilip otyr. Muny basqarma basshysy nárestelerdiń shala týýymen baılanystyrady. Oblystyq perınataldyq ortalyqta jyl saıyn 500-ge jýyq bala aıy-kúni jetpeı ómirge keledi. Jyl basynan beri 495 náreste shala týǵan. Qazir medısına damyǵan, 400 gramdyq náresteniń de janyn saqtap qalýǵa bolady. Degenmen, bul da ońaı jumys emes. Esepte turǵan júkti áıelderdiń 23 paıyzynyń densaýlyǵynda kinárat bar. Taǵy bir másele – týberkýlez aýrýynyń kórsetkishi edáýir artyp otyr. Muny mamandar ekpeden bas tartýdyń saldary deıdi. Bıyldyń ózinde 408 adam qurt aýrýyna qarsy ekpe saldyrmaǵan.
Oblystyq qoǵamdyq densaýlyqty saqtaý departamenti basshysynyń orynbasary Erbolat Ýaıysov sońǵy 3 jylda túsken 153 shaǵymnyń jartysynan kóbi medısınalyq qyzmettiń sapasyna baılanysty ekenin aıtady. Sonyń ishinde aýrýhanalardyń syrqat adamdy qabyldaýdan bas tartýy, jumysqa jaramsyzdyq jónindegi qujatty alýdaǵy qıyndyqtar men jedel járdemniń keshigip kelýi sekildi shaǵymdar jıi kezdesedi. Oblystyq máslıhat otyrysynda «Densaýlyq» memlekettik baǵdarlamasynyń júzege asýy týraly talqylaýda E.Ýaıysov taǵy bir problemany aıtty. Bul – bıologııalyq qaldyqtardy kómýge arnaıy oryn qarastyrylmaǵany. Aýdandardaǵy densaýlyq saqtaý mekemelerinde bıoqaldyqtardy ǵımarat aýlasyna tóge salý derekteri anyqtalǵan. Emhanalarda qańtarylyp turǵan qymbat qondyrǵylardyń ahýaly da kóńil kónshitpeıdi. Oblystyq aýrýhanadaǵy jalǵyz tomograf jaramsyz kúıde turǵanyna biraz ýaqyt boldy. Sonyń kesirinen turǵyndar jeke emhanalarǵa qaralýǵa nemese basqa qalalar men elderge barýǵa májbúr.
Jyl saıyn densaýlyq saqtaý salasyna qyrýar qarajat bólinedi. Atyraý oblysynda bıyl 27,9 mlrd teńge osy baǵytqa qaraldy. Saladaǵy sheshimin kútken máseleler retin tabaryna sengimiz keledi.
Baqytgúl BABASh,
«Egemen Qazaqstan»
ATYRAÝ
