Sońǵy málimet boıynsha Almatyda qoǵamdyq kólikte aqshasyz tólem jasaý úlesi 98 paıyz-
dan asqan. Bul kúnine 1 mıllıonnan astam elektrondy tranzaksııa jasalady degen sóz. Agenttik basshysyna Almatynyń Kólik holdınginde «Ońaı» elektrondyq júıesi men qoǵamdyq kólikti dıspetcherlendirý júıesiniń aralyq qorytyndylary tanystyryldy. Bul baǵytta edáýir ilgerileý baıqalady. Birer jyl buryn iske qosylǵan «OŃAI» júıesi men avtomattandyrylǵan kólik turaqtary mıllıardtaǵan qarjyny «kóleńkeden» shyǵaryp, olardy qala ekonomıkasyna tartýǵa múmkindik berip otyr. Mamandardyń sózinshe, atalǵan sala kóleńkeden tolyq shyǵaryldy dep aıtýǵa bolady. О́tken eki jylda Almatyda 634 qoǵamdyq kólik satyp alynsa, bıyl bul kórsetkish 716 jańa avtobýsqa jetken.
Búginde Almatydaǵy barlyq sıfrly joba negizinen úsh prınsıp boıynsha iske asyrylýda. Birinshi kezekte – ashyqtyqty qamtamasyz etý jáne jemqorlyq jaǵdaılaryn boldyrmaý, ekinshisi – ekonomıkalyq qaıtarym, úshinshisi – memlekettik qyzmet jáne qala turǵyndary úshin jaılylyq sapasyn arttyrý.
Alık Shpekbaev shahardaǵy Polısııa jedel basqarý ortalyǵyna da bas suqty. Polısııa departamentiniń Jedel basqarý ortalyǵynda agenttik tóraǵasyna damyǵan beınebaqylaý júıeleriniń engizilýi men «102» qyzmetiniń sapasyn arttyrý boıynsha qoldanylyp otyrǵan sharalar jóninde baıandaldy. Qazirgi tańda Almatyda qoǵamdyq jáne jol qaýipsizdigin arttyrý maqsatynda jyldamdyq rejiminiń buzylýyn avtomatty túrde anyqtaıtyn «RoadScanSpeed» júıesi, belgilengen jolaqqa shyǵyp ketýdi fotoǵa túsirip alatyn «Jolaq» júıesi, «Qaýipsiz aýla» baǵdarlamasy boıynsha beınekameralar jáne taǵy da birqatar joba iske qosylǵanyn aıta ketken jón.
«Búgingi tańda saladaǵy bilikti operatorlardyń sany artty, jańa qyzmetkerler qabyldanyp, olardyń jalaqylary úsh esege deıin ulǵaıyp otyr. 56 operator táýlik boıy jumys isteıdi. Olardyń jumys kestesi 24 saǵattan 12 saǵatqa qysqarǵany qyzmetkerler úshin óte tıimdi. Qyzmet kórsetý jyldamdyǵy artyp, jumys sapasy jaqsardy», deıdi Almaty qalasy IID bastyǵy Serik Kúdebaev.
Jumys sapary barysynda Alık Shpekbaev Ál-Farabı atyndaǵy Qazaq ulttyq ýnıversıtetinde ótken Bilim jáne ǵylym salasyna arnalǵan sybaılas jemqorlyqqa qarsy usynymdardyń 1-kezeńiniń tanystyrylymyna qatysty. Eske salsaq, QazUÝ bazasynda bıylǵy sáýir aıynda Memlekettik qyzmet isteri, Sybaılas jemqorlyqqa qarsy is-qımyl agenttigi jáne Almaty qalasy ákimdigimen birlese sybaılas jemqorlyqqa qarsy «Sanaly urpaq» jobalyq keńsesi qurylǵan bolatyn.
Sharany ashqan oqý ordasynyń rektory Ǵalym Mutanov: «Qazirgi tańda bul keńse jastardyń sybaılas jemqorlyqqa qarsy túsinigi men mádenıetin qalyptastyrý baǵytynda jumysyn jalǵastyryp jatyr. Keńse qurylǵaly 7 aı ishinde bilim berý mekemelerindegi barlyq deńgeı boıynsha jemqorlyqqa qarsy jumystardyń qyzmetin taldaý, olardyń sapa kórsetkishin óńdeý, sybaılas jemqorlyqtyń aldyn alý jáne oǵan qarsy jumystardyń tıimdiligin arttyrýdyń tetigin tabý baǵytynda birqatar is-sharalar ótti. Nátıje jaman emes», deıdi.
Qazirgi kezde elimizde jemqorlyqqa qarsy is-qımyldyń quqyqtyq quraldary jasalǵan. Memleket basshysynyń Jarlyǵymen Qazaqstan Respýblıkasynyń Jemqorlyqqa qarsy strategııasy bekitilgen, «Jemqorlyqqa qarsy is-qımyl týraly», «Qoǵamdyq keńes týraly», «Aqparattyń qoljetimdiligi týraly» mańyzdy zańdar qabyldanǵany belgili.
– Bizdiń ortaq mindetimiz – jemqorlyqty múldem qabyldamaıtyn ashyq oılaýdy, quqyqtyq jáne qarjylyq mádenıetti qalyptastyrý, turmystyq jemqorlyqty joıý. Memlekettik organdarǵa kelgen árbir jan keıde keleńsizdikke tap bolady. Mundaı jaısyz jaǵdaı bilim, densaýlyq saqtaý mekemeleri nemese quqyq qorǵaý organdarynda kezdesýi múmkin. Sondyqtan bul indetti túp-tamyrymen joıý maqsatynda negizgi salanyń barlyǵyn jappaı sıfrlandyrýdyń mańyzy zor. Rýhanı jańǵyrý baǵdarlamasy aıasynda «Sanaly urpaq» jemqorlyqqa qarsy jobalyq keńsesi ashylǵany barshaǵa aıan. Búgin biz osy ortalyqtyń negizgi qyzmet baǵyttarynyń iske asý barysyn jáne jemqorlyqpen kúreste joǵary oqý oryndarynyń ustazdaryn keńinen jumyldyrý máselelerin talqylaýǵa jınalyp otyrmyz. Jemqorlyqty túbegeıli joıý – memlekettik saıasattyń basty baǵyttarynyń biri. Elbasy N.Nazarbaev jemqorlyq dertimen kúreste azamattyq ustanym men qoǵamdyq belsendiliktiń mańyzdylyǵyn erekshe atap ótken. Osy rette «Sanaly urpaq» jobalyq keńsesiniń atqarar qyzmeti ushan-teńiz. Ortalyq ashylǵaly beri bilim berý mekemelerinde 200-ge jýyq ártúrli is-shara ótkizilip, 10 myńnan astam adam qamtyldy. Bilim salasynda jemqorlyq kórinisterin joıýǵa baǵyttalǵan naqty usynystar engizildi», deıdi atalǵan sharaǵa qatysqan qala ákimi Baýyrjan Baıbek.
Shahar basshysynyń sózinshe, bul bastamalar mekemelerdi sıfrly júıege kóshirý arqyly kóleńkeli ekonomıkany barynsha azaıtýǵa, bıýdjet qarajatyn únemdeýge qyzmet etýde. Máselen, 2015 jyldan beri jeke mekemelerde 12 myńnan astam oryndyq 327 balabaqsha ashylyp, jalpy sommasy 22 mıllıardty quraıtyn memleket qarjysy únemdelgen.
Arman OKTIаBR,
«Egemen Qazaqstan»
ALMATY
