Senat Tóraǵasy Qazaqstan Parlamenti úshin EQYU Parlamenttik Assambleıasy birinshi kezekte yqylas týǵyzatynyn, senatorlardyń halyqaralyq qyzmetinde onyń jumysyna belsendi qatysý basymdyqqa ıe ekenin aıtty. Ol, sondaı-aq Qazaqstandaǵy áleýmettik-ekonomıkalyq jáne saıası reformalar týraly júzdesýshini habardar etip, Prezıdent N. Nazarbaevtyń taıaýda jarııa etilgen Joldaýyndaǵy azamattardyń ál-aýqatyn arttyrýǵa baǵyttalǵan sharalarǵa jan-jaqty toqtaldy. Q.Toqaevtyń pikirinshe, Eýropa men Azııa arasyndaǵy saýda-ekonomıkalyq jáne kólik-logıstıka baılanystaryn keńeıtý basa nazar aýdarýdy talap etedi, ol aımaq turaqtylyǵyn qoldaýdaǵy mańyzdy máselelerdiń biri bolyp tabylady.
Senat Tóraǵasy atap ótkendeı, Qazaqstannyń EQYU-men ózara is-qımylynyń basym baǵyttarynyń qatarynda kólik, qaýipsizdik, kıberqaýipsizdik, zań ústemdigi men terrorızmge qarsy is-qımyl máseleleri bar. Q.Toqaev EQYU PA-nyń taıaýda Bishkekte ótken sessııasynyń nátıjeleri týraly oń pikir bildirdi jáne mundaı sharalar Ortalyq Azııanyń ózekti máselelerine halyqaralyq qoǵamdastyq nazaryn aýdarýǵa yqpal etetinin aıtty.
G.Seretelı Qazaqstandy EQYU-nyń mańyzdy áriptesteriniń biri retinde atady jáne ortaq qaterlerge birlese qarsy turý maqsatynda ózara únqatysýdy óristetýge eleýli túrde kúsh salý nıetin bildirdi. EQYU delegasııasynyń basshysy Qazaqstanda júzege asqan konstıtýsııalyq reformany joǵary baǵalady jáne Parlament mindetiniń keńeıýi men zań ústemdigin qoldaýǵa arnalǵan quqyqtyq ózgeristerdiń mańyzyn atap ótti. G. Seretelıdiń aıtýynsha, EQYU sot-quqyqtyq reformalar, aımaqtaǵy qaýipsizdikti qamtamasyz etý, terrorızmmen kúres máseleleri boıynsha Qazaqstanmen tyǵyz únqatysýdy odan ári jalǵastyrý nıetinde bolyp otyr.
