«Kópshiliktiń sanasynda tarıhı úderister, negizinen, tulǵalandyrý sıpatyna ıe bolatyny belgili. Kóptegen halyqtar óz eliniń erekshe elshisi syndy uly babalarynyń esimderin maqtan tutady. Mysaly, ótken dáýirlerdegi Týtanhamon, Konfýsıı, Eskendir Zulqarnaıyn, Shekspır, Gete, Pýshkın jáne Djordj Vashıngton sııaqty dúnıe júzine belgili tulǵalar búginde «óz memleketteriniń» baǵa jetpes sımvoldyq kapıtaly sanalady ári sol elderdiń halyqaralyq arenada tıimdi ilgerileýine septigin tıgizip otyr. Uly dala Ál-Farabı men Iаsaýı, Kúltegin men Beıbarys, Áz-Táýke men Abylaı, Kenesary men Abaı jáne basqa da kóptegen uly tulǵalar shoǵyryn dúnıege ákeldi. Sondyqtan, biz birinshiden, ataqty tarıhı tulǵalarymyz ben olardyń jetistikteriniń qurmetine ashyq aspan astynda eskertkish-músinder qoıylatyn «Uly dalanyń uly esimderi» atty oqý-aǵartý ensıklopedııalyq saıabaǵyn ashýymyz kerek», delingen maqalada.
Sondaı-aq Memleket basshysy qazirgi ádebıettegi, mýzyka men teatr syndy túrli sala tulǵalaryna arnalǵan galereıa jasaýdy qolǵa alýdy tapsyrdy.
«Ekinshiden, maqsatty memlekettik tapsyrys uıymdastyrý arqyly qazirgi ádebıettegi, mýzyka men teatr salasyndaǵy jáne beıneleý ónerindegi uly oıshyldar, aqyndar jáne el bılegen tulǵalar beınesiniń mańyzdy galereıasyn jasaýdy qolǵa alý qajet. Sondaı-aq bul jerde klassıkalyq qalyptan tys, balamaly jastar óneriniń kreatıvti áleýetin de paıdalanýdyń máni zor. Osyǵan oraı, bul iske tek otandyq qana emes, sonymen birge sheteldik sheberler men shyǵarmashylyq ujymdardy da tartqan jón», deıdi N.Nazarbaev.
Sonymen qatar elimizdiń tarıhı kezeńderin keńinen qamtıtyn «Uly Dala tulǵalary» atty ǵylymı-kópshilik serııalar shyǵarylyp, taratý jumystary bir júıege enetin bolady. Ol úshin qazaqstandyq ǵalymdarmen qatar sheteldik mamandar da tartylatyn halyqaralyq kópbeıindi ujym qurylady. Bul arqyly el qaharmandarynyń ómiri men qyzmeti jóninde tek qazaqstandyqtar ǵana emes, sondaı-aq sheteldik azamattar da biletin bolady.
