Astana men Almaty turǵyndary 2018 jylǵy jeltoqsan aıynda arnaıy belgilengen birqatar halyqqa qyzmet kórsetý ortalyqtaryna (HQKO) baryp, oń jáne sol qoldaryndaǵy eki saýsaǵynyń tańbalaryn tapsyrýlary kerek. Qazaqstandyqtardyń saýsaq tańbasyn jınaý kezeń-kezeńmen júzege asyrylmaq. El úkimeti elektrondy sıfrlyq qoltańbany osy bıometrııalyq derektermen almastyrýdy oılastyrýda.
«Biz muny pılottyq rejımde bıylǵy jyldan bastap endirýge kirispekpiz. Bastaý úshin eki qala – Astana men Almaty tańdap alyndy. Jeltoqsan aıynda egjeı-tegjeıin habarlaımyz: azamattar belgili bir HQKO-larǵa baryp, óz qalaýy boıynsha jeke basynyń bıometrııalyq derekterin tapsyra alady. Biz búginde eki bıometrııalyq kórsetkishti anyqtadyq. Onyń biri – adamnyń kádimgi fotobeınesi bolsa, ekinshisi oń jáne sol qoldaryndaǵy eki saýsaqtyń tańbasy bolady», – dedi «Azamattarǵa arnalǵan úkimet» memlekettik korporasııasynyń basqarma tóraǵasy Abylaıhan Ospanov.
Memleket osy arqyly eldegi jáne keıin shetelge ketetin barlyq azamattardyń saýsaq tańbasyna qol jetkizedi. Al budan qarapaıym adamǵa keler qandaı paıda bar? Barlyq HQKO-lardyń ústinen qaraıtyn, ári memlekettik qyzmetter kórsetýdi ortalyqtandyrýǵa jaýapty «Azamattarǵa arnalǵan úkimet» memkorporasııasynyń basshysy saýsaq tańbalaryn tapsyrǵan adamdar bolashaqta ózderimen birge eshqandaı qujat tasymaı, osy tabıǵat bergen «qoltańbasy» arqyly kez kelgen jerde memqyzmet alý múmkindigin ıelenetinin aıtady.
«Olar osy parametrleri arqyly avtorızasııalanyp, elektrondy memlekettik qyzmetter ala alady. Osyǵan qajetti qurylǵylar qoǵamdyq qoljetimdilik pýnktterinde, elektrondy úkimet portalynda, sondaı-aq HQKO-larda bolady», – dedi Abylaıhan Esenuly. Ol qazir eGov portalynan qyzmet alý úshin avtorızasııalanýdan ótý, jeke tulǵańyzdy sáıkestendirý talap etiletinin eske saldy.
Máselen, ESQ nemese bir rettik parol engizý qajet. «Avtorızasııa prosesi úshin bıometrııalyq parametrler paıdalanylatyn bolady. Al mekenjaılyq anyqtama, sottylyǵynyń joqtyǵy týraly anyqtama jáne basqa da halyq arasynda keń tanymal qyzmetter úshin avtorızasııa qalady. Sizge SMS-parol keledi, ony engizesiz de, memlektettik qyzmetke qol jetkizesiz. Biraq ol zańnamaǵa ózgerister engizilgenshe solaı bolady. Búginde zańnamany ózgertý boıynsha jumys júrgizilýde. Sodan keıin qazaqstandyqtarǵa óz bıometrııalary kómegimen de memqyzmet alýyna jol ashylady», – dedi memkorporasııa basshysy.
