Ýnıversıtettiń Baspasóz ortalyǵynyń basshysy Jandar Asannyń aıtýynsha, bul pán Qazaqstan tarıhynyń teorııalyq-metodologııalyq tujyrymdaryna negizdelgen. Kýrstyń hronologııalyq sheńberi elimizdiń ejelgi dáýirden XX ǵasyr basyna deıingi qalyptasqan tarıhı kezeńderimen anyqtalǵan.
Pán 15 taqyryptan turady. Taqyryptarda Uly dala tarıhy páni jáne onyń rýhanı jańǵyrý men tarıhı sanany qalyptastyrýdaǵy orny, Túrki mádenıetiniń dúnıetanymdyq máni jáne kóshpendilerdiń álemdi túısinýiniń erekshelikteri, Uly Jibek joly Eýrazııa qurlyǵyndaǵy memleketter men órkenıetterdiń mádenı suhbattastyǵy men ekonomıkalyq baılanystarynyń alǵysharty, qazaq halqynyń etnogenezi men ulttyq kody týraly tyń derekter qamtylǵan. Sonymen qatar, Uly daladaǵy táýelsizdik úshin kúres jáne ulttyq birlik pen biregeılik ıdeıalary, áskerı ónerdiń qalyptasýy men damý evolıýsııasy jáne Uly dalanyń uly tulǵalary jaıyndaǵy irgeli zertteý eńbekter de toptastyrylǵan.
– Pándi oqytý barysynda ulttyń ózindik ereksheligi men baı rýhanı tarıhyn aıǵaqtaıtyn oqıǵalarǵa jete nazar aýdarylady. Babadan balaǵa mıras bolǵan uly murany qadirleý, ony saqtaı otyryp, óz úlesińdi qosyp, damytý jáne keıingi urpaqqa amanat etip tabystaý sııaqty asyl qasıetter osy pán sheńberinde júzege asyrylady. Bul bastama – bolashaq mamandardyń bilim deńgeıin kóterýmen qatar, memlekettilikti nyǵaıtý, jańa qazaqstandyq patrıotızm men ulttyq qundylyqtar negizinde tarıhı sanany qalyptastyrý syndy ómirsheń ıdeıalardy júzege asyrýǵa septespek, – deıdi ýnıversıtettiń resmı ókili.
Qazirgi kúnde atalǵan pán boıynsha arnaıy oqý quraly daıyndalyp otyr. Oǵan belgili ǵalymdar men sala mamandary jumyldyrylǵan.
Aınash ESALI,
«Egemen Qazaqstan»
ALMATY
