Atalǵan baıqaýǵa qatysýǵa 6 úmitker nıet bildirip otyr. Qatysýshylar óz jobalaryn «Atameken» Ulttyq kásipkerler palatasynda Dúnıejúzilik sapa kúnine arnalǵan onlaı-konferensııa barysynda tanystyrdy.
− Búginde bıznes ókilderi básekege qabilettiliktiń negizgi quraly sapa ekenin túsinedi. Shyǵarylatyn ónimniń sapasyn únemi jaqsartyp otyrmasa, ishki naryqty birinshi qajettiliktegi taýarlarmen tolyqtyrý jáne eksportqa shyǵarý múmkin emes bolyp barady, – dedi «Atameken» UKP Tóralqasynyń tóraǵasy hatshylyǵynyń basshysy Lazzat Ramazanova.
«Ekofarm» JShS – baıqaýǵa qatysatyn otandyq kompanııanyń biri. Bul qan jınaý jáne saqtaýǵa arnalǵan bir rettik, sterıldi vakýýmdy tútik shyǵaratyn Qazaqstandaǵy jalǵyz kásiporyn.
− Kompanııamyz shyǵaratyn ónimdi Qazaqstannyń barlyq derlik aýrýhanalary, emhanalary men zerthanalary paıdalanady, – dedi «EkoFarm» JShS zertteý jáne ázirleý bóliminiń bastyǵy.
Maııa Súıinshalıeva «Sán ındýstrııasyndaǵy ınnovasııalar» jobasyn tanystyrdy. Isker hanym qoldanystan shyqqan plastık kartrıdjderdi qaıta óńdep, ony kıim-keshek óndirisine paıdalanbaq. Mundaı kıimge kreatıvti sýretter salynyp, kópshiliktiń nazaryn «jasyl ekonomıka» máselelerine tartýdy kózdeıdi. Al almatylyq Qadyrjan Maqanǵalı et delıkatesteri óndirisin myqtap jolǵa qoıǵan. Kásipker atalǵan brend shetelde Qazaqstannyń ónimi retinde tanylǵanyn qalaıdy.
− Italııalyq pıssa, nemis sosıskalary, chehııalyq shujyqtar týraly bilemiz. Týra osylaı álem bizdi «qazaq qazysymen» tanýy kerek. Ulttyq taǵamnyń dámdiligin jaqsarttyq, ony vakýýmdy qaptamada shyǵaryp jatyrmyz. Saqtaý merzimi delıkatesterdi shetelge eksporttap, qonaqtarǵa aýyz tıgizýge, jalpy brendti alǵa jyljytýǵa múmkindik berip otyr, – dedi Q. Maqanǵalı.
Atalǵan úmitkerler álemdik deńgeıdegi baıqaýǵa qatysý arqyly Qazaqstannyń áleýmettik-ekonomıkalyq turǵyda tıimdi jobalardy iske asyrýǵa nıetti ekenin taǵy bir dáleldemek.
Erkejan AITQAZY,
«Egemen Qazaqstan»
