Ulttyq dástúrimizdi saqtaýǵa jáne «Máńgilik El» patrıottyq ıdeıasynyń negizinde jeke tulǵany rýhanı turǵydan damytýǵa baǵyttalǵan aıtýly mádenı shara Qazaqstan Respýblıkasynyń Tuńǵysh Prezıdenti kúnine arnalyp ótkizildi.
О́nerli órender arasynda jyl saıyn ótkiziletin mereıli mýzyka baıqaýynyń negizgi maqsaty – jeke tulǵany qalyptastyrýdaǵy asa baı resýrs retinde án shyǵarmashylyǵynyń mańyzdylyǵyn arttyrý, mýzyka óneriniń túrli janrlarynda jas daryndy oryndaýshylardy anyqtaý jáne qoldaý sekildi mazmundy hám mańyzdy murattarmen astasady.
– Keń dalanyń qasıeti men qudireti bolar, qazaq eli – óte talantty halyq. Onyń aıqyn aıǵaǵy – Elbasymyzdyń ánshilik pen sazgerlik qyry. Jańa ǵana ekrannan kórsetilgen Prezıdentimizdiń oryndaýyndaǵy ándi tyńdap otyryp tańǵaldym. Kásibı mýzykant retinde bir falsh nota estigen joqpyn. Bul da bolsa qazaqtyń qanyna sińgen aıryqsha qasıetteriniń biri.
О́zderińiz biletindeı, ótken jyly tusaýy kesilgen joba bıyl mine, jalǵasyn taýyp, sapalyq turǵydan jańa deńgeıge kóterilgenine kýá bolyp qýanyp otyrmyn. Jas jetkinshekterimizdiń talantyn tanyp, bolashaǵyna baǵyt silteýge septesetin mundaı aýqymdy án baıqaýlary bizge óte qajet. Aldaǵy ýaqytta konkýrs óziniń geografııalyq aýqymyn keńeıtip, halyqaralyq deńgeıde ótkiziledi dep senemin jáne ol bastamany qýana qoldaımyn. Ulttyq mýzykamyz arqyly álem qazaqty tanyp jatsa, bul – biz úshin úlken mártebe, dedi qazylar alqasynyń tóraǵasy, belgili kompozıtor, Qazaqstannyń eńbek sińirgen qaıratkeri Keńes Dúısekeev.
Osymen ekinshi márte ótkizilip otyrǵan baıqaýǵa bıyl elimizdiń túkpir-túkpirinen barlyǵy 150 ótinim kelip túsken. Jas erekshelikterine saı 12 men 14 jas jáne 15 pen 17 jas aralyǵyndaǵy eki topqa iriktelip alynǵan úmitkerler Elbasy shyǵarmashylyǵynan tańdalǵan úzdik ánderdi oryndady. Jas ónerpazdar izdenisin kompozıtor, Qazaqstannyń eńbek sińirgen qaıratkeri, Qazaq Ulttyq óner ýnıversıtetiniń «Mýzykataný jáne kompozısııa» kafedrasynyń professory Keńes Dúısekeev tóraǵalyq etken qazylar alqasy sarapqa salyp, júzden júırik, myńnan tulpar shyqqan daryndy balalardy arnaıy dıplomdarmen marapattap, jeńimpazdarǵa mýzykalyq aspap alýǵa arnalǵan sertıfıkattar tabys etildi.
Baıqaý qorytyndysy boıynsha, «Babamnan qalǵan keń dala» nomınasııasynda Pavlodar qalasynyń Aqsý qalasynan kelgen «Mereı» toby top jarsa, «Bizdiń súıikti Prezıdentimizdiń ánderi tolqyny» atalymyndaǵy arnaıy júldeni Álııa Ábdiqadyr (Almaty qalasy), Názıra Ibragımova (Sátpaev qalasy) jáne «Juldyzaı» toby (Astana qalasy) teńdeı bólisti. «Qasıetti dombyra» nomınasııasy oraldyq Jasmına Palat, Aınar Mýsına, Sabına Jumageldınova esimdi ónerpazdardan quralǵan trıo men astanalyq Beıbarys Baıbórinovke tabys etildi. Al baıqaýdyń bas júldesi – Gran-prı syılyǵyn N.Á.Nazarbaevtyń «Gorod moı» ánin joǵary deńgeıde oryndap shyqqan talantty qatysýshy Astana qalasyndaǵy №66 mektep-lıseıiniń 11-synyp oqýshysy Anel Orazbaeva jeńip aldy.
Nazerke JUMABAI,
«Egemen Qazaqstan»
