Aqtaý, Beıneý jáne Atyraý eldi mekenderinde ornalasqan 25744, 99116 jáne 41433 áskerı bólimderindegi jas tolysymdaǵy sarbazdardyń daıarlyǵy jalǵasýda. Osy jyldyń kúzinde shaqyrylǵan sarbazdar tuńǵysh ret jaýyngerlik atystaryn ótkizdi.
Osy tájirıbelik sabaqtyń aldynda, barlyq jas sarbazdarmen atys qarýynyń sıpattamasy, atys erekshelikteri men qaýipsizdik erejeleri qarastyrylǵan teorııalyq kýrs ótkizilgen bolatyn. Osy kúni olar AK-74 avtomatynan bastapqy jáne birinshi oqý-atys jattyǵýlaryn oryndady. 99116 áskerı bólimi jas sarbazdar rotasynyń komandıri aǵa leıtenant Jandos Myrzahmettiń aıtýynsha, alǵash ret ótkizilgen atys qorytyndysy kútpegen nátıjelerge toly boldy. Úzdik mergenderdiń biri - 100 balldan 95 ball jınaǵan qatardaǵy jaýynger Ilıa Shlykov.
- Avtomatty alǵash ret qolǵa alǵan adam úshin bul keremet nátıje. Bizdiń sarbazdar áskerı daıarlyqtyń bastamalaryn jaqsy úırenip, endi ant qabyldaýǵa ázir. Búgingi kúni olarǵa áskerı bólimde barlyq jaǵdaı jasalǵan. «Batys» óńirlik qolbasshylyǵynyń áskerı bólimderine Qazaqstannyń barlyq aımaqtarynan sarbazdar shaqyryldy jáne biz olardyń isteri men sózderinen úlken qyzyǵýshylyq, al kózderinen ushqyndy kórýdemiz, deıdi rota komandıri.
Sonymen qosa, barlaý bólimsheleriniń sarbazdary ant qabyldaýdyń aldynda jasandy belesterge tolǵan, uzaq araqashyqtyqtan turatyn «barlaýshylar soqpaǵyn» ótti. Taktıkalyq alańda jeke quramnyń jeńil brondik tehnıkaǵa qarsy turý qabilettiligi men psıhologııalyq tózimdilikti tekseretin jattyǵý qabyldandy. Áskerıler bul normatıvti «tankpen basyp ótý» dep te ataıdy. Bul rette, sarbazdar jertasaǵa kezekpen ornalysyp, brondik tehnıkadan jasyrynýy, keıin ústerinen ótken tehnıkaǵa granata laqtyryp, jaýdyń tylyna shabýyl jasaýy tıis.
- Alystan qaraǵandy bul óte áserli jaýyngerlik urysqa uqsaıdy, alaıda bul qarapaıym ǵana normatıv. Jeke qaýipsizdikteri úshin sarbazdar tankige qarsy oqý granatalary men bos patrondardy qoldanady. Ár múmkindikten soń, sarbazǵa jeke baǵa qoıylady, deıdi jas sarbazdar rotasynyń komandıri kapıtan Dıas Kenesbekov.
Jas sarbazdar áskerı isti áskerdegi birinshi kúninen bastap oqı bastaıdy. Komandırler men tájirıbeli nusqaýshylardyń jetekshiligimen, olar áskerı tehnıka men qarý-jaraqty mamandyqtaryna sáıkes oqıdy. Jas sarbazdardyń daıarlyq baǵdarlamasynda qoıan-qoltyq urysynyń bastapqy elementterin meńgerý de qarastyrylǵan. Osy aptada, 1 jeltoqsan – Qazaqstan Respýblıkasynyń Tuńǵysh Prezıdenti kúni, «Batys» óńirlik qolbasshylyǵynyń jas sarbazdary ózderiniń dıslokasııalanǵan oryndarynda áskerı ant qabyldaý rásimine keltiriledi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
