Atalǵan ortalyqta stýdentterge bilim berý, áleýmettik-turmystyq, mádenı-tynyǵý baǵyttaryndaǵy qyzmetter usynylady. Mundaǵy qyzmet bilimgerler úshin «bir tereze» qaǵıdasy boıynsha iske asyrylady. Olar oqý ornynda paıdalanatyn biryńǵaı kod arqyly ortalyqtaǵy 7 sektorda bar qajetti qyzmetterge op-ońaı qol jetkize alady.
Smart tehnologııalardyń kómegimen qyzmet kórsetý alańynda 40-50 stýdent bir ýaqytta anyqtama ala alady. Ýnıversıtet rektory bul ortalyqty joǵary oqý ornyndaǵy sybaılas-jemqorlyqtyń aldyn alatyn, bilim berý sapasyn arttyratyn stýdentterge arnalǵan ashyq alań ekenin aıtyp ótti.
Sonymen qatar ýnıversıtettiń mereıli merekesine oraı «Qazfosfat» atty jańa zerthananyń lentasy qıyldy. Zertteý mekemesiniń basshysy Muqash Eskendirov sózine súıensek, kompanııa bıyl 17 mlrd teńge ınvestısııa quıǵan.
Jańa zerthana eki jaqty kelisim aıasynda hımııa-tehnologııalyq mamandaryn óndiristik jumystarǵa beıimdeý maqsatynda stýdentter ıgiligine berilip otyr. Joǵary oqý orny men arnaıy zerthananyń birlesken jobasy negizinde bilikti mamandar daıarlaý arqyly ınvestısııa kólemin aldaǵy ýaqytta 40 mlrd teńgege jetkizýdi josparlaýda.
Nurshat TО́KEN,
«Egemen Qazaqstan»
