Jıyndy ashqan ýnıversıtettiń ǵylymı jumystar jónindegi prorektory Qajymurat Ahmedenov Tuńǵysh Prezıdent kúni – memlekettik bılik ınstıtýtynyń sımvoly, Táýelsizdik irgetasyn bekite túsken mártebeli meıram ekenin aıtyp, ujymdy quttyqtap ótti.
- Qazaqstandaǵy eń kóne joǵary oqý oryndarynyń birinen sanalatyn Mahambet О́temisuly ýnıversıteti Memleket basshysy júrgizip kele jatqan barlyq bastamany qyzý qoldaıdy. О́ıtkeni bul reformalar – ár adamnyń kókeıindegi arman-maqsatqa jaqyndata túsedi, - dedi Qajymurat Maqsutuly.
Jıynda Qazaqstan Respýblıkasy memlekettik qyzmet isteri jáne sybaılas jemqorlyqqa qarsy is-qımyl Agenttiginiń BQO boıynsha departamentiniń sybaılas jemqorlyq profılaktıkasy basqarmasynyń basshysy Birjan Haırýllın sóz alyp, Aq Jaıyq óńirindegi memlekettik qyzmetshilerdiń búgingi kún talabyna saı jumysyna saraptama jasady.
Tarıh ǵylymdarynyń magıstri Danııal Tanzenov bolsa Elbasy N.Á.Nazarbaevtyń qazaq halqynyń rýhanı jańǵyrýyna qosqan úlesi týraly tarıhı turǵydan sóz qozǵady. Elbasynyń qazaq qoǵamynyń turaqtylyǵyn saqtaýdaǵy eńbegi gýmanıtarlyq bilim magıstri Gúlbaram Jálekenovanyń baıandamasyna da ózek boldy.
Al Batys Qazaqstan oblystyq Kásipkerlik jáne ındýstrıaldy-ınnovasııalyq jetildirý basqarmasynyń bas mamany, ekonomıst Nurlan Tashkenov elimizde kásipkerlikti qoldaý baǵytyndaǵy memlekettik baǵdarlamalar týraly aıtyp berdi. Jınalǵandar zań ǵylymdarynyń magıstri Dáýren Saǵynǵalıevtiń «Jańa kelbettegi Qazaqstannyń jahanǵa tanylýy» atty baıandamasyn da yqylaspen tyńdady.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen Rafhat HALELOV
