S.Gromov 1868 jylǵy Jarylǵysh jáne órtegish oqtardy qoldanýdan bas tartý týraly Sankt-Peterbýrg deklarasııasynyń tarıhı mańyzdy qujat ekenine konferensııaǵa qatysýshylardyń nazaryn aýdardy. Bul Deklarasııa áskerı qımyldar barysynda qarýdyń jekelegen túrlerin qoldanýǵa tyıym salǵan jáne halyqaralyq gýmanıtarlyq quqyqty odan ári damytýdyń negizin qalaǵan alǵashqy resmı kóp jaqty kelisim boldy.
Senat Tóraǵasynyń orynbasary jarty ǵasyr ýaqyt ishinde qarýdyń jańa túrleri, sonyń ishinde búkil adamzatty jer betinen joıyp jiberetin jappaı qyryp-joıý qarýlary paıda bolǵanyn atap ótti.
Osyǵan baılanysty S.Gromov 2016 jyly jarııalanǵan Prezıdent Nursultan Nazarbaevtyń «Álem. XXI ǵasyr» manıfesine nazar aýdardy. «Bul biregeı saıası qujat jahandyq qaýipsizdiktiń berik kepildigin qamtamasyz etý úshin álem qaýymdastyǵy basshylyqqa alýy tıis basty qaǵıdattardy qamtıdy. Birinshiden, Manıfeste atalyp ótkendeı, qazirgi zamandaǵy soǵystyń birde-birinde jeńiske jetkender bolmaıtynyn jete túsinýimiz qajet. Ekinshiden, jańa soǵysta jappaı qyryp-joıý qarýlaryn paıdalanbaý múmkin emes. Úshinshiden, memleketter arasyndaǵy barlyq daýlardy retteýdiń negizi beıbit únqatysý men syndarly kelissózder bolýy tıis», - dedi S.Gromov.
Ol Qazaqstan ıadrolyq qarýdan tolyq bas tartqan álemge qaraı dáıekti túrde ilgerileýge; ornyqty álem geografııasyn qalyptastyrýǵa; adamzatty bólip-jaratyn áskerı bloktardy jabýǵa jáne qarýsyzdandyrý úderisin jańa tarıhı ahýalǵa beıimdeýge úndeıtinin atap ótti.
S.Gromov jýyrda ǵana Astana klýbynyń otyrysynda Qazaqstannyń Prezıdenti N.Nazarbaevtyń sóılegen sózine parlamentshilerdiń nazaryn aýdardy. Elbasymyz geosaıası básekelestiktiń ýshyǵýy jahandyq qaýipsizdik negizderi men strategııalyq turaqtylyqty ózgertýine baılanysty óz alańdaýshylyǵyn bildirgen bolatyn. «Jahandyq syn-qaterlerdi eńserýdiń sheshimderin izdeý maqsatynda Prezıdent 1975 jyly qol qoıylǵan Helsınkı qorytyndy aktisin jańartýdy jáne 2020 jyly qaýipsizdik pen yntymaqtastyq jónindegi osyndaı konferensııany ótkizýdi usyndy. Elbasy N.Nazarbaev sondaı-aq Azııadaǵy qaýipsizdik jáne yntymaqtastyq jónindegi uıymdy qurý qajettigin atap ótti. Astananyń bastamasymen qurylǵan Azııadaǵy ózara yqpaldastyq jáne senim sharalary jónindegi keńes (AО́SShK) osy uıymnyń irgetasy bola alady», - dep málimdedi Senat Tóraǵasynyń orynbasary.
Sóz sońynda S.Gromov Sankt-Peterbýrg deklarasııasy «soǵys qajettilikteri adamgershilik talaptarynyń aldynda toqtaıtyn» shekarany quqyqtyq anyqtaý úderisiniń bastapqy núktesine aınaldy, dep atap ótti. «Deklarasııada qamtylǵan, adamgershilikti ózek etken qaǵıdattar men qundylyqtardy adamzattyń bolashaǵy úshin saqtalýy tıis», - dep atap ótti Tóraǵa orynbasary.
