Kópshiliktiń kóńilin baýraǵan mádenı is-shara Nazarbaev Zııatkerlik mektebi oqýshylarynyń uıymdastyrýymen osymen tórtinshi márte ótkizilip otyr. Bul kúndi asyǵa kútetin elimizdegi 20 Nazarbaev Zııatkerlik mektebiniń shákirtteri óz qalalaryndaǵy saýda ortalyqtarynda bas qosyp, mereıli merekege tartý jasaýdy dástúrge aınaldyrǵan.
Fızıka-matematıka baǵytyndaǵy jas daryndar mektebiniń dombyra orkestriniń músheleri kúı atasy Qurmanǵazynyń «Balbyraýyn», Ábdimomyn Jeldibaevtyń «Erke sylqym» kúılerin kúmbirlete oryndap kópshiliktiń alǵysyna bólendi. Al mektepshilik hor úıirmesiniń talanttary «Qazaq eli» ánin naqyshyna keltire shyrqap merekeniń shyraıyn ashty. Pedagog-uıymdastyrýshy Janerke Satqynbekovanyń sózinshe, oqýshylar bul kúnge aıryqsha daıyndalǵan. Olardyń ústindegi qazaqy oıý-órnektermen kómkerilgen ulttyq kıimderiniń ózi shákirtter úshin bul merekeniń máni zor ekenin ańǵartatyndaı. Júzderi bal-bul jaınaǵan olar óz áserlerimen bólisti.
«Búgin barsha elimiz úshin úlken mereke. Elbasynyń atymen atalatyn mektep bolǵannan keıin bul kún bizge erekshe jaýapkershilik júkteıtindeı kórinedi. О́nerimizdi pash etip, halyqtyń kóńil-kúıin kóteremiz. Jarqyn bolashaǵymyz úshin eńbek etken Prezıdentimizge alǵysymyzdy osy arqyly jetkizgimiz keledi», deıdi Fızıka-matematıka baǵytyndaǵy Nazarbaev Zııatkerlik mektebiniń 7 «a» synyp oqýshysy Aldııar Jaısańbaev.
2014 jyly ashylǵan bilim ordasynda búgingi tańda myńǵa tarta shákirt bilim alýda. Oqytýshylar quramy tájirıbesi mol bilikti mamandardan quralǵan. Shet elderden arnaıy shaqyrtylǵan ustazdar dáris beredi. Bir aıta keterligi, az jyldar ishinde mektep shákirtteri halyqaralyq olımpıadalarda top jaryp, jas zııatkerlerge arnalǵan álemdik jobalarda kósh basynan kóringen.
Arman OKTIаBR,
«Egemen Qazaqstan»
ALMATY
