«Bul – Rýdnyı qalasyndaǵy birinshi sıfrlandyrylǵan emhana. Osyǵan deıin is qaǵazsyz júrgiziletin emhana bolǵan joq. Munda alynǵan sheteldik jabdyqtar da sıfrlandyrylǵan. Mysaly, sıfrlyq rentgen syrqat adamdy túsirgennen keıin sol sátte nátıjesin qolyna beredi. Tirkeý ornynda kelýshilerge qyzmet kórsetý nebári 3 mınýtqa sozylady. Mundaı standart buryn kenshiler qalasynda bolmaǵan» deıdi osy emhanaǵa ınvestısııa salǵan «Stomed» kompanııasynyń prezıdenti Vladımır Klımenko.
Emhananyń ashylý saltanatyna oblys ákimi Arhımed Muhambetov qatysyp, rýdnyılyqtardy merekemen jáne qalaǵa jańa áleýmettik nysannyń qosylýymen quttyqtady.
«Bul jańa, zamanaýı emhana 15 myń qalalyqqa qyzmet kórsetedi. Ol óziniń tolyq qýatynda jumys istegende taǵy da 5 myń adam qosymsha bekitiletin bolady. Emhana memleket pen jeke menshiktiń yntymaǵy arqasynda paıda boldy. «Stomed» kompanııasy ınvestısııa saldy, bıýdjetten 19,9 mıllıon teńge bólinip, emhananyń ınjenerlik jelisi jasaldy, sýbsıdııa bólinedi» dedi Arhımed Begejanuly.
Emhana 26 adamǵa jumys berip otyr. Medısına mamandary da jetkilikti. Kúnine 200 adamdy qabyldaı alady.
Názıra Járimbet,
«Egemen Qazaqstan»
Qostanaı
