Qazaqstan Respýblıkasy Tuńǵysh Prezıdenti kúnin batysqazaqstandyqtar birneshe qýanyshty oqıǵamen atap ótti. «Jastar» stadıonynda qala turǵyndary úshin syrǵanaý maýsymy ashylsa, kınoteatrlar «Elbasy joly» fılmin kórermenderge usyndy. Eń úlken qýanysh Oral qalasynda sońǵy jyldary paıda bolǵan «Kóktem» shaǵynaýdanynda boldy. Munda 120 páterlik jańa úı paıdalanýǵa berildi.
Ásel Jaǵyparova – jubaıy da, ózi de memlekettik qyzmetshi. «Búgin 3 bólmeli páter aldyq! Kórip shyqtyq, unady, jyp-jyly, ádemi. 3 balamyz bar. Turǵyn úı kezeginde alty jyl turdyq. Sońǵy úsh jyl boıy salym jınadyq. Mine, endi óz baspanamyzǵa qolymyz jetip, qýanyshymyzda shek joq!» deıdi ol.
Búgin eki bólmeli páter kiltin alǵan zeınetker Rahılıa Kárimova bul úıdiń qurylysyn salynyp jatqan kezinen baqylap, qadaǵalap júripti. Sapasyna kóńili tolady eken.
- Biz de úsh jyl boıy «Turǵynúıqurylysjınaqbankine» qarjy jınadyq. Búgin eki bólmeli páterge qolymyz jetti. Páterimiz jyly ári keń, - deıdi Lázzat Moldasheva.
- Ata-babamyz ańsaǵan Táýelsizdikke qol jetkizip, ózimiz el bolyp, óz Prezıdentimizdi saılaǵan kúnimiz qutty bolsyn. Tuńǵysh Prezıdentimiz kúnine oraı Elbasymyz qabyldaǵan «Nurly jer» ınfraqurylymdy damytý memlekettik baǵdarlamasy boıynsha búgin 120 páterdi jańa ıelerine - «Turǵynúıqurylysjınaq» bankiniń salymshylaryna tapsyrǵaly otyrmyz. Bul jerde 6-7 jyl buryn bir de bir úı bolǵan joq edi, bos jatqan dala bolatyn. Qazir qarańyz, qanshama úıler, mektep, emhana, sporttyq keshen salyndy, joldar tóselip, aınala abattandyryldy. Osynyń bári – Táýelsizdiktiń jemisi. Elimizdiń damýyna jasalyp jatqan Elbasynyń eńbegi. Búgingi jetistikke kópultty halqymyzdyń birliginiń arqasynda jetip otyrmyz. Árqaısymyz «Osy meniń qalam, osy meniń elim» dep eńbek etsek, bıikke kóterile beremiz. Damyǵan 30 el emes, odan da joǵary nátıjege jetemiz, - dedi Batys Qazaqstan oblysynyń ákimi Altaı Kólginov jańa turǵyn úıdiń saltanatty tapsyrylý rásiminde.
Qurylys quny 1 mlrd teńgege baǵalanǵan jańa úıdiń qurylysyn «JaıyqSelStroı» JShS bir jyldan asa ýaqyt ishinde aıaqtaǵan.
- Aldaǵy ýaqytta biz taǵy da jańa úılerdi paıdalanýǵa beremiz. Dál qazir Batys Qazaqstan oblysynda «7-20-25», «Nurly jer» t.b. memlekettik baǵdarlamalar boıynsha kópqabatty 24 úı, aýdandarda 104 úı salynyp jatyr. Osy úıler tapsyrylǵan kezde 3500-den asa otbasy jańa baspanaǵa ıe bolady. Memleket qarapaıym qazaqstandyqtardyń ómir sapasyn arttyrý úshin bolashaqta da eńbek ete beredi. Táýelsizdik kúnine oraı Oralda jańa mektep, taǵy da kópqabatty turǵynúıler paıdalanýǵa beriledi, - degen óńir basshysy páter ıelerine jańa baspana tek jaqsylyqtyń, baq pen berekeniń uıasy bolýyn tiledi.
Osy kúni Aıda Beıisova, Ilııas Maqsot, Lázzat Moldasheva, Erjan Zaınýllın, Pelageıa Belıaeva, Elaman Amanǵulov jáne basqalary páter kiltin Altaı Kólginov pen Oral qalasynyń ákimi Murat Muqaevtyń óz qolynan aldy. Kúnniń aıazyna qaramastan qyzyqqa jınalǵan jas balalar shashýǵa qaryq boldy.
Tuńǵysh Prezıdent kúni oraldyq sportshylar úshin de qýanyshty boldy. Bul kúni qala irgesindegi Derkúl aýylynda 700 sharshy metrlik, oblys ortalyǵynyń Egizbaev kóshesinde aýmaǵy 453,7 sharshymetrlik sport keshenderi paıdalanýǵa berildi. Munda halyqtyń túrli buqaralyq sport túrlerimen aınalysýyna barlyq jaǵdaı jasalǵan. Máselen, «NARYN» sporttyq-saýyqtyrý kesheniniń eki deńgeıli ǵımaratynda voleıbol, basketbol alańdary, bı zaly, ústel tennısi jabdyqtalǵan. Keshen alǵashqy kúnnen-aq básekeli dýǵa tolyp ketti: munda Tuńǵysh Prezıdent kúnine oraı munda ústel tennısinen erler, memlekettik qyzmetkerler jáne tirek-qımyl júıesi zaqymdanǵandar arasynda ústel tennısinen respýblıkalyq ashyq týrnır bastaldy.
Aıta keteıik, Oral qalasy aýmaǵynda buǵan deıin 7 sporttyq-saýyqtyrý kesheni sportsúıer buqaraǵa qyzmet etetin. Búgin olardyń sany 9-ǵa jetti. Munyń beseýi – memlekettik bolsa, tórteýi – jekemenshik.
Qazbek QUTTYMURATULY,
«Egemen Qazaqstan»
Sýretti túsirgen Temirbolat TOQMÁMBETOV
