Táýelsiz qazaq anımasııasy tarıhynda tuńǵysh ret tól qaharmandar týraly árqaısysy 10 serııadan túsirilgen «Aıdar», «Dala oıyndary» jáne «Ertemir» atty 3D formattaǵy mýlthıkaıalar – búgingi otandyq televızııa salasyndaǵy biregeı úzdik jobalar sanatynda. «Balapan» telearnasy dırektory Maqpal Jumabaıdyń bastamasymen jaryqqa shyqqan aıtýly týyndylardyń árqaısysy óziniń ıdeıa sonylyǵy, maǵynalyq mazmun jáne eń bastysy qazaqy boıaý-qalybymen daralanady.
«Biz tuńǵysh ret qazaqtyń tól anımasııalyq sýper qaharmandaryn kórermen nazaryna usynyp otyrmyz. Bul jobalardy júzege asyrý úshin elimizdiń anımasııalyq qaýymdastyǵy judyryqtaı jumylyp jumys istedi. Osy mýlthıkaıalar arqyly otandyq anımasııanyń jańa kezeńi bastalaryna senimdimiz. «Balapan» qaharmandary «Dala oıyndary», «Aıdar», «Ertemir» mýlthıkaıalary arqyly ár balanyń júregine jol tartady. Bul – ár jobany zor jaýapkershilikpen júzege asyrǵan, ár keıipkerdi aıalap, álpeshtegen shyǵarmashylyq komandamyz úshin de, qazaq balasy úshin de tarıhı sát dep oılaımyz», dedi M.Jumabaı.
10 jeltoqsannan bastap «Balapan» telearnasy arqyly kishkentaı kórermender nazaryna jol tartqan týyndylar áli-aq «О́rmekshi adam» sekildi jahan jetkinshekteriniń júregin jaýlaǵan keıipkerdiń ornyn basyp, qazaq balasy óziniń tól qaharmandaryna eliktep, solarǵa qarap boı túzeıdi degen senim mol.
Nazerke JUMABAI,
«Egemen Qazaqstan»
