Merekelik kúnderge oraı, Ulttyq arna óz kórermenderine qyzyqty shoý-baǵdarlamalar men arnaıy jobalar daıyndap otyr. Aıta ketsek, kishkentaı kórermender áıgili «Walt Disney» kınokompanııasynyń úzdik anımasııalyq fılmderin tamashalaı alady. 31 jeltoqsan kúni 11:15-te «Hanshaıym men Qurbaqa» kórsetilse, 1 qańtarda 11:45-te «Pıngvınder bıi», al, 2 qantar kúni 13:20-da «Juldyzdy tóbet» jáne t.b anımasııalyq fılmdermen tolyǵady. Bul anımasııalyq fılmderdiń barlyǵy «Qazaqstan» korporasııasynyń kınokórsetilim jáne dýblıaj bóliminde aýdarylyp, dybystalǵan.
Sonymen qatar, 31 jeltoqsan kúni 14:25-te «Alataýym- altyn uıam» atty Respýblıkalyq aqyndar aıtysynyń 1 bóliminiń tusaýkeseri bolmaq. Al, aıtystyń jalǵasyn, 2 jáne 3 bólimderin 1 qańtarda 15:35-te jáne 2 qańtarda 14:40-ta kórýge bolady. Ulttyq arna ázilsúıer kórermenderine arnap 18:10-da, «Qazaqstan» korporasııasynyń «Altyn qorynda» saqtalǵan, kezinde keńinen tanymal bolǵan «Tamasha» oıyn-saýyqtyq baǵdarlamasyn tartý etpek. Kórermen kózaıymyna aınalǵan baǵdarlamaǵa elimizdiń birtýar ártisteri - Qudaıbergen Sultanbaev, Toqsyn Qulybekov, Meıirman Nurekeev jáne t. b qatysqan bolatyn.
Odan basqa, 19:45-te belgili ánshiler: Álisher Kárimov, Lýına jáne «Format» tobynyń qatysýymen «Ázil álemi» tok-shoýynyń jańa jyldyq shyǵarylymy kórermenge jol tartady.
Ulttyq arnanyń kórermenderine usynatyn eń basty syıy - «20.19 Basty arnadaǵy Jańa jyl» atty mýzykalyq shoý-baǵdarlamasy efırge 21:50-de jáne 00:00-de shyǵady. Merekelik shoýda qazaq estradasynyń tanymal ánshileri: Maqpal Júnisova, Bekbolat Tileýhan, Janar Doǵalova, Erke Esmahan, Qaırat Túntekov, Zırýza, Rıngo toby jáne t.b óz ónerlerin kórsetedi. Al, «20.19 Basty arnadaǵy Jańa jyl» shoý-baǵdarlamasynyń bas qonaǵy álemge tanymal ánshi Dımash Qudaıbergen bolmaq.
