30 myńdaı turǵyny bar aýylda buǵan deıin mádenıet oshaǵy atymen bolmaǵan. Eldimekende ónerge qanat qaqqan jastardyń talabyn shyńdap, túrli merekelerde halyqqa rýhanı azyq syılaý maqsatynda 2 qabattan turatyn, 600 sharshy metrlik mádenıet oshaǵy boı kóterdi. Sáýleti kelisken mádenıet oshaǵynda barlyq tıisti jaǵdaılar jasalǵan, jylý, sý júıesi ortalyqtandyrylǵan. Kórermen zaly, horeografııa bólimi, túrli úıirme kabınetteri, kitaphana, ádistemelik kabınet, qazaq ulttyq aspaptar orkestri syndy jumys jasaıtyn 10 úıirme de kerekti jabdyqtarmen qamtamasyz etilgen.
– Bıyl biz «Bolashaqqa baǵdar:rýhanı jańǵyrý» maqalasy aıasynda aýdan boıynsha 3 aýyldyq klýb ashtyq, ıaǵnı Zelenyı Gaı, Novoıshımka, jáne búgin ashylyp jatqan Qosshy mádenıet úıi. Barlyq mádenıet úılerinde 51 shyǵarmashylyq uıym bar,onyń 3 «halyqtyq» degen atqa ıe, taǵy da 3 ujym osy ataqty alý úshin Mınstrliktiń sheshimin kútip otyr. Qoldanysqa berilip jatqan Qosshy klýbynan eldiń mádenıetine úles qosar jastar shyǵady degen úmittemiz bárimiz,–dedi Selınograd aýdanynyń ákimi Málǵajdar Tátkeev.
Búgingi tańda Selınograd aýdanyna qarasty 23 mádenıet nysany bar, onyń 19 memlekettik, 13-i belsendi. Qosshy aýylynda lentasy kesilgen bul ǵımarat 24-shi bolyp tirkeýge alyndy. Aýdan mádenıet úıleriniń materıaldyq-tehnıkalyq bazasyn nyǵaıtý úshin aýdandyq bıýdjetten 26,3 mıllıon teńge bólingen bolatyn. Atqarylyp jatqan osy ispettes aýqymdy jobalar óz nátıjesin berip kele jatyr, atap aıtatyn bolsaq Selınograd aýdany sońǵy úsh jyldy «Aqmola juldyzdary» oblystyq halyq shyǵarmashylyǵy baıqaýynyń úzdikteri atanyp júr.
Elimizdiń strategııalyq maqsattarynyń biri – eldiń ishki jalpy ónimindegi shaǵyn jáne orta bıznestiń úlesi 2050 jylǵa qaraı kem degende 50 prosent bolýyn qamtamasyz etý bolsa, bul maqsatqa qol jetkizý úshin «Nátıjeli jumyspen qamtý jáne jappaı kásipkerlikti damytý» jańa baǵdarlamasy bekitilgen bolatyn. Osy baǵdarlamalar aıasynda Qosshy aýylynda «Qazyna-SR» seriktestigi kompanııasynyń jıhaz sehy qoldanysqa berildi. Tek jergilikti turǵyndar ǵana emes, kórshiles eldimekenderden kelgen bas-aıaǵy 60 adam qyzmet atqarady, kompanııa jumysshylardy turǵyn úımen ózderi qamtamasyz etedi.
–Bul seh tolyǵymen avtomattandyrylǵan rejımde jumys atqarady. Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyn oqyǵan kezde bizdiń el mundaı qadamdarǵa áli daıyn emes dep oılaǵan bolatynmyn, biraz ýaqyt ótkennen keıin oıymnyń olqy ekenin túsindim. Sóıtip, osy jumysty qolǵa alyp, jıhaz sehyn ashyp otyrmyz. Avtomattandyrylǵan rejımde jumys jasaý arqyly biz eń birinshi taýardyń sapasyn jaqsartamyz ári ýaqytty únemdeýge tıgizer paıdasy mol,– «Qazyna - sr» seriktestiginiń dırektory Saıra Mataıbaeva.
Shyn máninde, shaǵyn jáne orta kásipkerlik – el ekonomıkasynyń utqyr ári nátıjeli sektorynyń biri. Ishki jalpy ónimniń eleýli bóligin óndirý solardyń úlesinde.
Baıqal BAIÁDIL,
«Egemen Qazaqstan»
Aqmola oblysy
