Esikti Aıekeńniń ózi ashty. Toqsandy eńserip tastasa da, beli búgilmegen, eńsesi túspegen shıraq qalpynda.
Tórgi bólmege ozdyq. Jazý ústeliniń ústi qobyraǵan qaǵazǵa toly. Árqıly kitaptar, kúndelikti gazet-jýrnaldar. Eń ústindegi «Egemen Qazaqstan» kózimizge ottaı basyldy.
Meniń gazet-jýrnalǵa nazar aýdarǵanymdy ańǵarǵan bolýy kerek, sál jymıyp kúldi de:
– Áli de jazý-syzýdan, oqýdan qol úzgen joqpyz,–dedi Aıekeń, – keıde ótken ómir soqpaqtaryn kóz aldyma elestetip, kókirektiń tereń bir túkpirinde jatqan, ýaqyt shymyldyǵymen tumshalanǵan jaılardy qaıta jańǵyrtyp, kúndelik jazǵan bolamyn. Atqa minip júrgen kezimizde talaı jaqsy-jaısańmen joldas boldyq qoı. Osy kúni solardyń kóbi ómirden ótip ketti. Keıingige ónege bolsyn dep ómirleriniń ǵıbratty tustaryn marjan tergendeı ekshep jazǵym keledi. Biraq qaırat kemigen soń qalam da yntaǵa ılikpeıdi eken ǵoı.
Aıdarhan Temirbaev aqsaqal zamanynda eki birdeı aýdandyq gazettiń redaktory bolǵan adam. Jaıǵasyp otyrǵannan keıin áńgimeniń aý-jaıy basylym jaıyna aýysty. Onda da shyǵa bastaǵanyna júz jyl tolǵaly otyrǵan «Egemen Qazaqstan» gazeti taqyrybyna.
– Qazir gazet óte mazmundy shyǵyp jatyr. Men jıyrma beske tolar-tolmasta Zerendi aýdandyq «Sosıalıstik jol» gazetiniń redaktory bolyp taǵaıyndaldym. Aýdandyq partııa komıtetiniń birinshi hatshysy Hasan Bekturǵanovtyń usynýymen. Odan soń sol kezdegi Kókshetaý oblysynyń jer kólemi jaǵynan eń úlken aýdany – Qyzyltýda aýdandyq gazettiń redaktory bolyp taǵaıyndaldym. Sóz óneri, onyń ishinde kez kelgenge jalynan sıpatpaıtyn jýrnalıstıka óte qıyn óner. Úırenýden jalyqpadyq. Aýdan jýrnalısteri oblystyq, respýblıkalyq basylymdarǵa qaraılaıdy. Ol kezde shynyn aıtqanda, respýblıkalyq «Sosıalıstik Qazaqstan» gazetiniń tili tym resmıleý bolatyn. Álgi «SQ-nyń tili syqıyp turady» deı-tuǵyn ázil sózdiń shyǵýyna sebep bolǵan sol jaıt edi ǵoı. Qazirgi «Egemenmen» salystyrýdyń ózi qıyn. Ýaqyt alǵa jyljyǵan saıyn gazettiń de túrlenip, mazmuny baıyp, ózgerýi zańdy. Sóz arasynda «Egemenniń» sońǵy kezde adam tushynyp oqıtyn gazetke aınalǵandyǵyn aıta ketsek te artyq bolmas. Ásirese «Tirshilik túıtkilderi», «Izgilik ıirimderi», «Qaz-qalpynda» aıdarlarymen beriletin materıaldary qandaı tamasha?! Sodan keıingi bir jaı «Múmkindigi shekteýliler múmkindigi» aıdarymen beriletin materıaldardy oqyǵanda, kóńilińniń arǵy túkpirindegi buıyǵyp jatqan sezimder oıanyp, ári-sári kúıge túsesiń. Myna zamanda on eki múshesi saý keıbir adamdar eki qolyna bir kúrek taba almaı daǵdaryp júrgende, taǵdyrdyń tálkegine ushyraǵan kembaǵaldardyń ómirdiń ókpek jeline boı bermeı, qaıta alǵa umtylýy tańǵaldyrady. Eriksiz rıza bolasyń. Men solaı ekenmin-aý dep bireýge qol jaıyp otyrmaı, óz betinshe tyrbanyp tirlik isteýi qandaı ǵanıbet. Bul tamasha mysal emes pe?! Múgedekterdiń ózi múmkindiginshe tirlik isteýi ózge jurttyń da namysyna tıip, jigerin janymaı ma? Menińshe, bul sol úshin qajet. Osyny gazet basshylary durys ańǵaryp otyr. Qazir aǵa gazet eldi jaqsy isterdiń negizinde uıystyryp, soǵan nasıhatshy bolyp, jol siltep júrgendigi jarasymdy.
Qart jýrnalıstiń qadaý-qadaý oıyn qalpynsha, shyp-shyrǵasyn shyǵarmaı jazyp alýǵa tyrystyq. Ásirese elmen birge eseıip, el qamyn jep, jurt jaıyn oılaǵan jaqsy basylym – «Egemen Qazaqstan» gazetiniń búgingi deńgeıin quptaǵan, qýattaǵan lebizi qandaı?! Bul júzge tolǵanymen jalyny jastyń qýatyndaı basylymnyń bolashaǵyna degen senim!
Baıqal BAIÁDIL,
«Egemen Qazaqstan»
Aqmola oblysy
