QR Eńbek jáne halyqty áleýmettik qorǵaý mınıstri Mádına Ábilqasymovanyń aıtýynsha, respýblıkalyq jáne oblystyq mańyzy bar qalalarda biryńǵaı jıyntyq tólemi 1 AEK (2525 teńge), al basqa eldimekenderde 0,5 AEK (1263 teńge) kóleminde belgilenip otyr. Atalǵan aqshanyń 10 prosenti jeke tabys salyǵyna, 20 prosenti - Memlekettik áleýmettik saqtandyrý qoryna, 30 prosenti - Biryńǵaı jınaqtaýshy zeınetaqy qoryna, 40 prosenti Mindetti áleýmettik medısınalyq saqtandyrý qoryna avtomatty túrde túsedi. Osylaısha, bir tólemmen tórt birdeı jarna aýdarylady. Sonyń nátıjesinde beıresmı jumyspen qamtylǵandar áleýmettik kómekti barlyǵymen teń dárejede ala alady.
«Jalpy alǵanda, Biryńǵaı jıyntyq tólemdi engizý beıresmı jumyspen qamtylǵandarǵa: Mindetti áleýmettik medısınalyq saqtandyrý júıesine qatysýǵa jáne somasy men túrleri shektelmegen medısınalyq qyzmetterge qol jetkizýge, medısınalyq mekemelerdi tańdaýǵa; jınaqtaýshy zeınetaqy júıesine qatysýǵa ári júıege qatysý ótiline qaraı bazalyq zeınetaqy tólemin alýǵa; eńbek etý qabiletinen, asyraýshysynan aıyrylǵan jaǵdaıǵa, júktilik pen bosanýǵa, bala asyrap alýǵa, bala 1 jasqa deıin onyń kútimine baılanysty áleýmettik tólemder alýǵa múmkindik beredi», - dedi M. Ábilqasymova. Onyń sózine qaraǵanda, biryńǵaı jıyntyq tólemin aýdarý ıa aýdarmaý - árbir azamattyń óz erki. BJT-ny tólemegeni úshin eshqandaı sharalar qoldanylmaıdy.
«Úkimet sanksııa saıasatynan bas tartty. Negizinde kodekste ákimshilik jaza qarastyrylǵan. Iаǵnı, adamdar tapqan tabysyn jasyryp otyr. Búginde jazalaýdan góri yntalandyrýǵa basymdyq berilýde. Azamattar atalǵan tólemnen bas tartpaǵan jaǵdaıda qandaı áleýmettik kómek alatynyn bilýi tıis. BJT rejıminde májbúrlik sıpat joq. Bul jerde eshqandaı jazalaý qarastyrylmaǵan. Bul tetik arqyly buryn atalǵan qyzmetterdi paıdalana almaǵan adamdar áleýmettik qoldaýǵa qol jetkizedi. Bul salyqtyń jańa túri emes. Bul salyqtar buryn da tólenip turatyn. Tek ózin ózi jumyspen qamtýshy azamattar endi eń az mólsherde tólep turatyn bolady. Tóleı me, tólemeı me - adamnyń óz erki», - deıdi M.Ábilqasymova.
