Osy bir qyzyq áńgimeni aıtqan kisi aldymyzdan kóringen ana-a-aý qyzǵylt shoqynyń ar jaǵyndaǵy Shanaq degen aýylda turýshy edi. Ol ózi bir aqkóńil, aýzyn ashsa, júregi kórinetin jaqsy adam-tuǵyn. О́tken jyly dúnıe salypty dep estidim.
…Ilgeride, Ekinshi dúnıejúzilik soǵys kezinde mundaǵy jurt poshta tasıtyn adam taba almaı qınalǵan kórinedi. Sebebi buǵan deıin hat-habar tasyp júretin jas áıel aıaq-astynan jaman aýrýǵa shaldyǵyp, bir aıǵa jetpeı qaıtys bolypty. Sodan ony «qara qaǵaz alǵan úılerdiń qarǵysy atty» degen áńgime jeldeı esip, eldiń úreıi ushpaı ma.
E-e, ol kezde qaıǵydan qan jutyp, kókiregi qars aıyrylyp otyrǵan jurt kimdi qarǵamady deısiz?!.
Anaǵan bir, mynaǵan bir jalynyp, poshta tasýǵa eshkimdi kóndire almaı aýylsábettiń basy qatady. О́ıtkeni kimge qolqa salsa da, at-tonyn ala qashady eken. Mine, osyndaı qıyn kúnderde keńsege bir uzyn boıly, ústinde sary tony bar beıtanys kisi kelip, qolymen ymdap, aýylsábettiń ústeliniń ústinde jatqan poshtanyń sómkesin nusqap, muny men tasıyn degendeı nıet bildiredi.
Sodan bastap aýylǵa poshta úzbeı kelip turady. Alystaǵy soǵys atty tajal jiberip jatqan «qara qaǵazdar» da toqtamaıdy. Aıyna, aptasyna kem degende bir-eki úıdi ańyratyp, kóz jasyn kól qylyp ketedi. Sóıtse de bul aýylǵa qaıdan kelgeni belgisiz mylqaý shal óz mindetin ún-túnsiz atqaryp júre beredi.
Birde aýylsábettiń tóraǵasy ortalyqqa baraıyn dep atyna minip jatqanda álgi poshtashyny kórip qalyp: «Oý, aqsaqal, maǵan mingesińiz, ala keteıin», deıdi. Biraq ol basyn shaıqap, qolyn sermep, atqa minbeı qoıady. Sodan tóraǵa esh jerge toqtamaı, sar jelip otyryp ortalyqqa kelmeı me. Sóıtse... O-o, Qudaıdyń qudireti, manaǵy aýylda júrgen shal poshtanyń aldynda tur deıdi. «Áı, bul qashan, qalaı kelip qaldy?» dep ań-tań.
Ne de bolsa, endi sol shalmen birge qaıtýdy oılaıdy. Ári-beri kútip, poshtadan shyǵa qoımaǵan soń ishke kirse, aýylǵa aparatyn hat-habarlardy alyp, ketip qalypty. Al endeshe, jol-jónekeı qýyp jetermin dep tóraǵa qaıtadan atyna minedi.
Biraq jol-jónekeı poshtashy shaldyń qarasy kórinbeıdi. Áne-mine dep alańdap kele jatyp uzaq joldyń jartysyn qalaı óndirip tastaǵanyn baıqamaı da qalady. Kenet onyń kózi sona-a-aý bir qıyrda buldyrap ushyp bara jatqan sary tonǵa túsedi. O toba, mundaı da ǵajap bolady eken-aý! Álgi poshtashy shal aýada qalqyp ushyp barady deıdi...
Eldiń aıtýynsha, soǵys aıaqtalǵan kúni ol bir túnde ǵaıyp bolypty. «Apyr-aı, qıyn jyldary kelip, qaıǵymyzdy bólisip júrgen arýaq eken ǵoı!» dep úlken kisiler áli kúnge deıin bastaryn shaıqaıdy.
Nurǵalı ORAZ,
«Egemen Qazaqstan»
