Aldymen jınalǵandarǵa mektepke deıingi, jalpy jáne orta bilim berý, tárbıe jumysy, tehnıkalyq jáne kásiptik bilim berý baǵyttary boıynsha pedagogtardyń maqalalary engizilgen jınaq tanystyrylyp, muǵalimderdiń avtorlyq baǵdarlamalary, ozyq tájirıbeleri usynylǵan ınnovasııalyq kórme tamashalandy. Odan keıin alqa májilisi aıasynda 500-den astam bilim salasy mamanyna arnalǵan bes seksııalyq otyrys uıymdastyryldy. Olarǵa «Nazarbaev zııatkerlik mektepteri» derbes bilim berý uıymy basqarmasynyń tóraıymy Kúlásh Shámshıdınova, «EDTECH» halyqaralyq bilim berý ortalyǵynyń bas dırektory, Qazaqstan Ulttyq «IýNESKO» klýbtary federasııasynyń vıse-prezıdenti, RhD doktory Ǵanı Beısenbaev, «SAGarden School» atqarýshy kompanııacynyń bas dırektory, «Astana Garden School» negizin qalaýshy Nurmuhammed Dosybaev, jeke mektep basshylary qatysyp, mektepterdi basqarý formalary, top-menedjerler rezervin qurý, sapasyn arttyrý máseleleri boıynsha baıandama jasap, tájirıbemen bólisti. «Qazınterservıs» kompanııasynyń robototehnıka bóliminiń menedjeri Ulan Jamlıhanov 3D prıntıng jáne vırtýaldy shynaıylyq ınnovasııalyq bilim berý tehnologııalaryn, ınteraktıvtik oqytý júıesin tanystyrdy.
Keńeıtilgen alqa májilisin ashqan oblystyq bilim basqarmasynyń basshysy Gúlmıra Kárimova elimiz ben sheteldik bilim berý júıeleriniń negizgi aıyrmashylyqtaryn sóz ete otyryp, sońǵy jyldary qazaqstandyq júıe eleýli ózgeristerge ushyraǵanyn atap ótti.
«2018 jyly óńirimizdiń bilim salasyna quıylǵan ınvestısııa kólemi 2017 jylmen salystyrǵanda, 3,5 esege artyp, 6,5 mıllıard teńgege jetti. Bıyl materıaldyq-tehnıkalyq bazany nyǵaıtyp, bilim alýshylardyń saýattylyǵyn arttyrý maqsatymen 60 mıllıard teńgege jýyq qarjy bólinedi», dedi ol.
Bilim jáne ǵylym mınıstrligi Ybyraı Altynsarın atyndaǵy ulttyq akademııasy orta bilim mazmunyn ádisnamalyq qamtamasyz etýdi úılestirý ortalyǵynyń dırektory Qarlyǵash Qudabaeva «Pedagog mártebesi týraly» Zań jobasymen tanystyrdy. Ustazdardy talqylaýǵa belsene qatysýǵa shaqyrdy. Qazirgi mektepterdegi aqparattandyrýdan bastap bilim berý tehnosferasyna deıingi úderis jaıynda «EDTECH» Halyqaralyq bilim berý ortalyǵynyń bas dırektory Ǵanı Beısenbaev baıandap berdi.
Alqa májilisin oblys ákiminiń orynbasary Madııar Qojahmet qorytyndylap, bilim berý júıesiniń kadrlyq áleýeti elimizdiń bilim salasyn damytýǵa, kúrdeli memlekettik mindetterdi sheshýge múmkindik beretinine senim bildirdi.
О́mir ESQALI,
«Egemen Qazaqstan»
Soltústik Qazaqstan oblysy
