О́ńirde halyq sanynyń kóbeıgeni, sondaı-aq egin sharýashylyǵynyń azdy-kópti etek jaıyp, mal sharýashylyǵynyń mańyzdylyǵy arta túskeni sý tushytý kólemin arttyryp, ónimdiligin ulǵaıtýdy talap etýde. Bul talaptar saladaǵy jumystardy jandandyra túsý kerektigin uqtyrdy. Osy turǵyda teńiz sýyn aýyz sý retinde tushytýmen aınalysatyn «Kaspıı sý tushytý zaýytyn» jańǵyrtý jumystary aldyńǵy kezekte qolǵa alyndy. 2017 jyly «Nurly jol» baǵdarlamasy aıasynda 3,1 mlrd teńgege zaýyttyń qondyrǵylary jańartylyp, sý tushytý qýaty táýligine 30 myń tekshe metrge jetti. Búginde zaýyt Munaıly aýdanyn tolyqtaı, Qaraqııa aýdanynyń Quryq aýylyn aýyz sýmen qamtamasyz etýde.
Teńizdiń telegeı sýyn tolassyz tushytý zor qajyr-qaıratty qajet etedi. Biraq zaýyttyń qýatyn birte-birte arttyrý – turmys talap etip otyrǵan qajettilik, aýyz sý muqtajdyǵyn óteýdiń tóte joly. Mańǵystaý oblysynda búginde «Kaspıı sý tushytý zaýyty» jumys ónimdiliginiń qýatyn táýligine 40 myń tekshe metrge jetkizý maqsatyndaǵy jumysty qolǵa alǵan. Qazirgi tańda jobanyń tehnıkalyq-ekonomıkalyq negizdemesi jasalyp, memlekettik saraptamanyń qorytyndysy alyndy. Quny 10 mlrd teńgege eseptelgen jobany bıyl «Nurly jol» memlekettik baǵdarlamasy aıasynda qarjylandyrý kózdelgen.
– Bul jobanyń júzege asyrylýy Munaıly aýdanyn tolyqtaı Túpqaraǵan aýdanynyń Aqshuqyr jáne Saıyn Shapaǵatov atyndaǵy aýyldaryn sapaly aýyz sýmen qamtamasyz etýge múmkindik beredi. Búginde oblys boıynsha 3 qalalyq eldi meken 100 paıyz, 58 aýyldyq eldi mekenniń 40 nemese 69 paıyzy ortalyqtandyrylǵan aýyz sýmen qamtamasyz etilgen, − deıdi Mańǵystaý oblystyq energetıka jáne turǵyn-úı kommýnaldyq sharýashylyǵy basqarmasy basshysy J.Salımov.
О́ńirdegi teńiz sýyn aýyz sýǵa aınaldyrýmen aınalysatyn ekinshi nysan retinde Qaraqııa aýdanynyń Quryq aýylynda sý tushytatyn zaýyt qurylysy júzege aspaq. Memleket-jekeshelik áriptestigi tetigi boıynsha salynatyn zaýyt táýligine 50 myń tekshe metr sý tushytady dep shamalanǵan. Konkýrstyń birinshi kezeńi boıynsha «Safbon Water Service Holding Inc Shanghai» kompanııasy jeńimpaz bolǵan zaýyt qurylysy 2020 jylǵa deıin júrgizilýge tıis. Mańǵystaý oblystyq energetıka jáne turǵyn úı-kommýnaldyq sharýashylyǵy basqarmasynyń málimetinshe, qazirgi tańda aldyn ala quny 37 mlrd teńgege eseptelgen jobanyń tehnıkalyq-ekonomıkalyq negizdemesi jasalýda. Sondaı-aq zaýytta tushytylǵan sýdy taratý úshin «Aqtaý-Quryq-Jetibaı-Shetpe» sý taratqyshyn salý josparlanǵan. Quny 29,9 mlrd teńge turatyn bul jobanyń tehnıkalyq-ekonomıkalyq negizdemesi jasalyp, memlekettik saraptamanyń qorytyndysy alynǵan. Bıyl jobalaý jumystary bastalady.
Bul jobalardyń júzege asyrylýy Qaraqııa aýdanynyń Quryq, Munaıshy, Jetibaı aýyldaryn, Mańǵystaý aýdanynyń Shetpe aýylyn aýyz sýmen qamtamasyz etýge septigin tıgizedi. Sonymen qatar Aqtaý qalasy, Qaraqııa jáne Mańǵystaý aýdandarynda egin jáne mal sharýashylyǵyn damytý úshin de paıdalanylady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
