Maqat – eldi mekenderiniń sany jaǵynan oblystaǵy eń shaǵyn aýdan. Sońǵy jyldary aıtarlyqtaı ınvestısııa tartyp otyr. О́tken jyly negizgi kapıtaldaǵy ınvestısııa kólemi 11 mlrd 853 mln teńgege jetti. «Byltyr aýdanda 26 320 sharshy metr turǵyn úı paıdalanýǵa berildi. Ekonomıkanyń barlyq sektorynda 1730 jumys orny quryldy, bul 2017 jylmen salystyrǵanda 24,1 % joǵary», dep atap ótti aýdan ákimi Jumabaı Qaraǵaev.
О́ńirdegi jańalyqtyń biri − Qarabatan stansasynda «Suıyltylǵan kómirsýtegi gazyn qabyldaý, saqtaý jáne júkteý» jobasyn júzege asyrý boıynsha jobalyq jumystardy júrgizý josparlanyp otyr. Jobalaý jumystary 2019 jyly bastalyp, 2021 jyly aıaqtalady.
– Jobany, qurylys jumystaryn júzege asyrý kezinde 500 jumys orny ashylady. Qurylys aıaqtalǵannan keıin 100 adam turaqty jumyspen qamtylady. Keshenge jyl saıyn 750 myń tonna suıyltylǵan kómirsýtegi gazy túsedi dep kútilýde. Jobany iske asyrý aýdan bıýdjetin 700 mln teńgege tolyqtyrýǵa múmkindik beredi, − deıdi aýdan ákimi.
Aýdanda qurylys salasy qarqyndy damyp kele jatqanyn atap ótý kerek. Bıyl Dossor kentinde 60 páterlik turǵyn úı qurylysy bastalady. S.Sháripov atyndaǵy mektep-ınternat pen L.Shahatov atyndaǵy mektep kúrdeli jóndeýden ótedi. Dossorda 5,8 shaqyrym avtojol, 3,4 shaqyrym jolaýshylar joly jóndeledi. Bıyl 100 oryndyq sanatorlyq tıptegi balabaqsha paıdalanýǵa beriledi. 280 oryndyq balabaqsha salynady. Qazir aýdan boıynsha balabaqsha kezeginde 800 bala tur. Úsh balabaqshanyń qurylysyna jobalaý-smetalyq qujattama ázirlenip jatyr.
Osyndaı jumystar Maqatta da qolǵa alynady. О́tken jyly bastalǵan kentindegi tazartý qondyrǵysynyń qurylysy bıyl aıaqtalady degen jospar bar. Aýdan basshysy osy arqyly ekologııalyq problemalar sheshimin tabatynyn aıtty. Búginge deıin barlyq káriz qaldyqtary tazarmaǵan kúıinde býlaný alańyna quıylyp keledi.
Jumys sapary barysynda aımaq basshysy Nurlan Noǵaev aýdandyq qorǵanys isteri bólimi men sanatorlyq tıptegi «Shapaǵat» balalar baqshasyna da bardy. Aýdandyq qorǵanys isteri bóliminde oblys ákimi jaqyn arada jańa ǵımarat qurylysy bastalatynyn atap ótti. «Qazir aýdandyq qorǵanys isteri bólimderine jańa ǵımarat salýdyń tıptik jobasyn jasap jatyrmyz. Birinshi nysan Mahambet aýdanynda salynady, keıin basqa aýdandarda da jalǵasady», dedi N.Noǵaev.
Aýdannyń áleýmettik-ekonomıkalyq kórsetkishterinde oń ózgeris baıqalady. Sońǵy jyldary aýyl sharýashylyǵy da jaqsy damyp, saladaǵy jalpy ónim 749,8 mln teńgege ósti.
Baqytgúl BABASh,
«Egemen Qazaqstan»
Atyraý oblysy
