Sharany uıymdastyrýshy «Kaspıı» shańyraǵynyń pedagog-kýratory Aqgúl Sarmanovanyń aıtýynsha, baıqaýdy ótkizýdegi basty maqsat – balalardy kitap oqýǵa yntalandyrý, «Nazarbaev Zııatkerlik mektepteri» DBBU «100 kitap» jobasynyń tanymaldylyǵyn arttyrý.
– Mektebimizdegi kitapsúıer oqýshylardyń basyn biriktirip, «DARA» atty oqyrmandar klýbyn qurdyq. Atalǵan uıym balalar men ata-analar arasynda kitap oqýdyń tanymaldylyǵyn arttyryp, shyǵarmalarǵa jarnama jasaýdy, ata-anany mektep ómirine belsendi aralastyrýdy kózdeıdi. Nátıjesinde, klýb músheleri osyndaı qyzyqty saıysty ótkizýdi usyndy, – deıdi ol.
«Tátti kitap» jobasy aıasynda árbir shańyraq ekinshi toqsan sońynda jerebe kómegimen oqıtyn úsh kitapty anyqtaıdy. Keıin ol kitaptardy oqyp, synyp bolyp talqylaý júrgizedi. Jarys kúni jarys talaptaryna sáıkes tort daıyndap, ony kópshilik aldynda qorǵap, ózderi daıyndaǵan tort-kitapqa jarnama jasady. Jalpy kólemde oqýshylar 50-ge jýyq kitap oqydy.
Saıysta qazylar alqasynyń sheshimimen E.Hemıngýeıdiń «Shal men teńiz» povesi negizinde «Mańǵystaý» shańyraǵynyń qatysýshylary daıyndaǵan tátti eń úzdik tort dep tanyldy. Al «Qaraqııa-1» toby S.Nazarovanyń «Moı zelenoglazyı arýah» kitabyn jáne «Aqorda-2» shańyraǵy A.Bektiń «Volokolamskoe shosse» kitabyn beınelep ekinshi oryndy ıelense, úshinshi oryn B.Shoýdyń «Pıgmalıonyn» beınelegen «Qaraqııa-2» tobyna jáne Sharlotta Bronteniń «Djeın Eır» kitabyn sýrettegen «Aqorda-1» tobyna, Antýan de – Sent Ekzıýperıdiń «Malenkıı prıns» kitabyn beınelegen «Saýra» shańyraqtaryna buıyrdy.
– Mundaı qyzyqty jarysqa alǵash ret qatysyp turmyz. Biz ózimizge erekshe áser qaldyrǵan Sherhan Murtazanyń «Aı men Aısha» shyǵarmasynyń jelisinde tort daıyndadyq. Bul týyndyda jazýshynyń balalyq shaǵynda basynan keshkenderi, otbasy týraly baıandalǵan. Erekshe áser syılaıtyn kitapty oqýǵa keńes beremiz, deıdi «Tamshaly» shańyraǵynan qatysqan Nazgúl Qýantqan men Qýanysh Beatrıss.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
