Júgeriden sýsyn daıyndaý qazaq úshin tańsyq emes. Bul aptap ystyqta taptyrmaıtyn sýsyn. Júregiń sazsa sýsyn túbindegi dáni − taǵam. Qala, aýdan bitkenniń kópshilik kóp júretin oryndarynda júgeri, tary, kúrishten sýsyn qaınatqandar qymyz sapyrǵandaı ojaýmen suıyq, qoıýyn aralastyryp satyp otyrady.
Al Qasym daıyndaǵan sýsynnyń odan jóni bólek. Ala shańnyń ortasynda antısanıtarlyq jaǵdaıda otyrǵan saýdagerlerdeı emes, óz ónimine úlken jaýapkershilikpen qaraıdy. Patenti, sertıfıkaty bar. Qazaq taǵamtaný akademııasynyń sapasy jaqsy, tutynýshylarǵa usynýǵa bolady degen negizdemesin alǵan. Iаǵnı, sanıtarlyq talaptarǵa saı ónim.
Júgeriden sýsyn jasap shyǵarsam degen ıdeıamen is bitpeıdi. Talaptan bólek, tutynýshylardyń talǵamynan shyǵatyndaı etip daıyndaý ádisteri biliktilikti qajet etedi. Kásipkerlikti óristetý úshin bilim kerek. Osynyń bárin oı-eleginen ótkizgen Qasym túrli jobalarǵa qatysyp júrip, ınnovasııalyq jobalarǵa memleket tarapynan bólinetin 3 mıllıon teńge qarjyny jeńip aldy.
– Júgeride A, V, S, jáne D dárýmeni bar, − deıdi Qasym. – Adam aǵzasyna kerekti kalıı, magnıı sııaqty elementter mol. Iаǵnı, shólirkeseńiz kepken yndynyńyzdy basyp qana qoımaıdy, densaýlyǵyńyzdy da nyǵaıtady.
Jańaqorǵandyq kásipkerler sóziniń jany bar. Birde áleýmettik jelide kórshi elderdiń birindegi shyryn daıyndaıtyn sehta jumys istegen qazaq jigiti ondaǵy sumdyq bylyqtyń betin ashty. Jylǵa jýyq jumys istep júrip, sehqa ákelingen birde-bir jemisti kórmepti. Qaı jaqta daıyndalǵany belgisiz konsentratty qosyp, alýan túrli shyryndar daıarlanady eken. Hımııalyq qospa bolǵannan keıin adam aǵzasyna zııan ekendigi belgili.
Al en dalada jaıqalyp ósip turǵan júgeriniń jóni bólek. Tabıǵı sýsyn. Osyǵan deıin popkorn daıyndap, tutynýshylaryn tapqan Qasym endi qarbyz ben qaýynnan shárbat daıyndamaq. Shıkizat qaıda deıtindeı emes, baý-baqsha ónimderi aýdanda úlken kólemde ósiriledi. «Alystan arbalaǵansha, jaqynnan dorbala» degen osy shyǵar.
Baqtııar TAIJAN,
«Egemen Qazaqstan»
Qyzylorda oblysy
