Is-sharada palata Tóraǵasy depýtattardyń zań shyǵarýshylyq jumysy týraly, sonyń ishinde, Memleket basshysynyń bastamasymen qabyldanǵan zańdar týraly áńgimeledi.
Palata Spıkeri «Qazfosfat» zaýytynda bolyp, kásiporynnyń jumysymen tanysty. Qazaqstandaǵy hımııa ónerkásibi jaǵynan alǵashqy qatarda turǵan kásiporynǵa bıyl 20 jyl tolady. Osy ýaqyt ishinde «Qazfosfat» tek elimizde ǵana emes, basqa shet memleketterge de fosfor ónimderin shyǵardy. Sonymen birge TMD, Qytaı, Shyǵys jáne Batys Eýropa elderine jol taýyp, álemdik deńgeıdegi iri óndiris ornyna aınaldy. Qazirgi ýaqytta elimiz boıynsha 7 fılıal ashylyp, ol 6 myńnan astam azamatty jumyspen qamtamasyz etip otyr.
Eńbek ujymymen kezdesý barysynda palata Spıkeri Elbasy Nursultan Nazarbaev táýelsizdik alǵan kúnnen bastap árbir oblystyń, árbir aýdannyń, árbir qalanyń damýyna zor kóńil bólip kele jatqanyna, sonyń ishinde túrli-tústi metaldarǵa, barıtke, fosfattarǵa baı Jambyl oblysynyń orny óte mańyzdy ekenine toqtaldy.
– Elbasymyzdyń salıqaly saıasatynyń arqasynda memleketimizdiń óńdeý ónerkásibi 9,5 trln teńgege deıin artyp, otandyq ónimderimiz álemniń 110 elinde satylyp keledi. Memleketimizde júrgizilgen iri reformalardyń arqasynda qazaqstandyqtardyń turaqty tabys tabýyna keń jol ashyldy, – dedi N.Nyǵmatýlın.
Sonymen qatar palata Spıkeri elimizdegi áleýmettik jaǵdaıǵa toqtalyp, táýelsizdik alǵan jyldardan bastap elimizdegi jalaqy kólemi 4 esege deıin óskenin, 1 mıllıonnan astam qazaqstandyq turǵyn úımen qamtamasyz etilgenin, aldaǵy bes jylda Prezıdentimizdiń áleýmettik baǵdarlamasy aıasynda 70 mıllıon sharshy metrden astam turǵyn úı salý josparlanǵanyn, ol 2 mıllıonnan astam adamǵa baspanaly bolýǵa múmkindik beretinin aıtty.
Búgingi tańda elimizdiń alǵa qoıǵan maqsaty − damyǵan 30 eldiń qataryna jetý. Osy jolda álemdik naryqqa jol tapqan Jambyl oblysynyń da úlesi zor. Qazirdiń ózinde de kóptegen jetistikterge qol jetkizgen. Mysaly, oblys boıynsha óndiris kólemi ótken jyly 400 mlrd teńgeni qurasa, jumys istep turǵan shaǵyn kásiporyndar sany 63 myńnan asqan.
Jambyl oblysynyń qarqyndy damýyna nazar aýdarǵan Májilis Tóraǵasy: «Oblys jyl saıyn joǵary deńgeıde damyp kele jatyr. Sonymen birge «Qazaqstan − 2050» baǵdarlamasy bizdiń jarqyn bolashaǵymyzdyń basty baǵdary bolyp tabylady. Sondyqtan sizderdiń qajyrly eńbekterińiz, bizdiń zań shyǵarý jumysymyz − barlyǵy da týǵan elimizdiń ósip-órkendeýi jolyndaǵy ıgi qadamdardy júzege asyrýǵa qyzmet etedi. Aldaǵy ýaqytta da biz ortaq maqsat jolynda birlese jumys isteıtin bolamyz. Osy oraıdaǵy eń tıimdi baǵyttyń biri – depýtattardyń saılaýshylarmen kezdesýi ekeni sózsiz. Bul kezdesýler halqymyz úshin de, bizder úshin de óte mańyzdy», dedi.
Májilis Tóraǵasy Jambyl oblysynyń jastarymen kezdesý barysynda Jastar jylynyń ashylýyndaǵy Memleket basshysynyń kórsetken qoldaýy týraly aıtty. Al kezdesý kóp jyldyq tarıhy bar, búginde elimizdegi eń irgeli oqý oryndarynyń qataryna kiretin Muhammed Haıdar Dýlatı atyndaǵy Taraz memlekettik ýnıversıtetinde ótti. Oǵan Jambyl oblysyndaǵy jetekshi oqý oryndarynyń stýdentteri, jastar qozǵalysynyń kóshbasshylary jáne jas ǵalymdar qatysty.
N.Nyǵmatýlın jastarmen kezdesý barysynda bıylǵy jyl jastar úshin erekshe kezeń ekenine toqtaldy.
− Prezıdentimiz Jastar jylynda jas qazaqstandyqtardy qoldaýdyń naqty joldaryn usynyp otyr. Ol eń aldymen, jas otbasylarǵa arnalǵan baspana máselesi. Memleket basshysy iri qalalarda jumys isteıtin jastar úshin jylyna 1 myń páterden kem emes qurylysty qamtamasyz etýdi jáne barlyq kásiporyndarǵa jas qyzmetkerler úshin baspana jaǵdaıyn jasaýǵa belsene qatysýdy tapsyrdy, − dedi palata Spıkeri.
Májilis Tóraǵasy Memleket basshysynyń jastarǵa kórsetip otyrǵan qamqorlyǵy týraly aıta kelip, olardyń eńbekke qabilettiligimen qatar, densaýlyq, rýhanı máseleleri de árqashan basty nazarda bolatynyna toqtaldy.
− Osy oraıda Memleket basshysynyń «Rýhanı jańǵyrý» baǵdarlamasy men «Uly dalanyń jeti qyry» maqalasy óskeleń urpaqtyń rýhanı baılyǵyn, densaýlyǵyn arttyrýǵa erekshe yqpal etetini sózsiz. Bul jumystardyń barlyǵy sizderdiń ómirlerińizdi jaqsartý, qoǵamdaǵy rólderińizdi nyǵaıtý, básekege qabilettilikterińizdi kúsheıtý úshin jasalyp jatyr, − dedi N.Nyǵmatýlın.
Palata Spıkeri osy aýqymdy sharalardyń barlyǵyn zań jaǵynan jan-jaqty qoldaý qajettigin atap kórsetip, Elbasynyń barlyq bastamalaryn sapaly zańdarmen qamtamasyz etý – Parlament depýtattarynyń basty mindeti ekenine nazar aýdardy. Sondaı-aq osy jolda «Memlekettik jastar saıasaty týraly» jáne «Volonterlik qyzmet týraly» zańdar qabyldanǵanyn, Memlekettik jastar saıasatynyń 2020 jylǵa deıingi baǵdarlamasy bar ekenin jáne jaqyn ýaqytta Májiliste «Pedagog mártebesi týraly» jáne basqa da bilim salasyna qatysty zań jobalary qaralatynyn jetkizdi.
Jambyl oblysyna saparyn qorytyndylaı kele, N.Nyǵmatýlın: «Jambyl oblysynda ótken kezdesýler Elbasy Nursultan Ábishuly Nazarbaevtyń barlyq bastamalary jergilikti jerlerde tabysty oryndalyp jatqanyn kórsetti. Ásirese áleýmettik sala, sıfrlandyrý, kásiporyndardy jańǵyrtýǵa arnalǵan jobalar halqymyzdyń ómir sapasyn jaqsartyp, jańa jumys oryndaryn ashýǵa múmkindik berip otyr. Aldaǵy ýaqytta da osy mańyzdy jumystar oblystyń damýyna, sonymen birge jastardy jan-jaqty qoldaýǵa serpin beretini sózsiz», dedi.
Hamıt ESAMAN,
«Egemen Qazaqstan»
Jambyl oblysy
