Sýretti túsirgen Rafhat Halelov
Batys Qazaqstan oblysynyń ákimdigi men M.О́temisov atyndaǵy Batys Qazaqstan memlekettik ýnıversıteti uıymdastyrǵan halyqaralyq dóńgelek ústel jıynyna Reseı Federasııasy Orynbor memlekettik ýnıversıtetiniń Ońtústik Oral tarıhy men etnografııasy ǴZI mamandary men zııaly qaýym ókilderi qatysyp, oı-pikir almasty.
Eýrazııalyq joba – 1990 jyldary Qazaqstan basshysy usynǵan tujyrymdamalyq ilim, egemendi Qazaqstannyń ulttyq-memlekettik strategııasynyń mańyzdy bóligi. Prezıdent «halyqaralyq birlestikter tájirıbesin uzaq zerttep, TMD elderindegi jaǵdaıdy jete taldap» «yqpaldasý úderisin jyldamdatý kerek» degen qorytyndy jasady. 1994 jyldyń 29 naýryzy kúni Reseı Federasııasyna resmı sapary sheńberinde Nursultan Nazarbaev M.V.Lomonosov atyndaǵy Máskeý memlekettik ýnıversıtetinde sóz sóılep, onda Qazaqstan basshysy jańa aımaqtyq birlestik – «Eýrazııalyq Odaq» qurý jónindegi ıdeıany damytty. Nazarbaevtyń bastamasy ǵylymı ortada úlken qyzyǵýshylyq týdyrdy. Álem elderi eýrazııalyq jobany talqylaǵan kezde Qazaqstandy postkeńestik respýblıka retinde emes, qazirgi halyqaralyq damýda ózindik jeke orny bar memleket retinde qarastyrady.
- Elbasynyń Eýrazııalyq odaq qurý ıdeıasynyń negizinde eń aldymen Qazaqstannyń ekonomıkalyq múddesi, eldiń ekonomıkalyq damý bolashaǵy turǵandyǵy aqıqat. Sonymen birge, Eýrazııalyq odaq tek qana Qazaqstan men Reseı arasynda emes, bul keleshekte Eýrazııa keńistigine túgel taralatyn úlken ıdeıa dep oılaımyn, – deıdi Batys Qazaqstan oblysy Qazaqstan halqy Assambleıasy tóraǵasynyń orynbasary Ǵaısa Qapaqov.
Dóńgelek ústel barysynda orynborlyq ǵalymdar da eki el arasyndaǵy mádenı-ǵylymı baılanystardyń ómirsheńdigine senim bildirdi. Osy jyly maýsym aıynda Oral qalasynda ótkeli otyrǵan bıznes forýmǵa Reseı Federasııasynyń kóptegen aımaǵynan kásipkerler kelýge nıet bildirgen.
- Bul forýmǵa Orynbor oblysynan ǵana 50-den astam kásipkerlik nysany qatysady. О́ıtkeni iskerlik baılanystar, eki el kásipkerleriniń tájirıbe almasýy eki jaqqa da tıimdi bolmaq, - deıdi Orynbor oblysy mádenı jáne syrtqy baılanystar mınıstrliginiń Shekaralyq áriptestik jáne syrtqy baılanystar basqarmasy tóraǵasy, vıse-mınıstr Aleksandr Kalının.
«Evrazııalyq keńistikte ıntegrasııa máseleleri óte ózekti. Ekonomıkalyq, saıası, qaýipsizdik turǵysynan alyp qarasaq ta eýrazııalyq memleketterdiń odaǵynyń bolashaǵy zor, - deıdi BQMÝ-daǵy Qazaqstan halqy assambleıasy kafedrasynyń meńgerýshisi, osy jıyndy uıymdastyrýshylardyń biri Turar Shaıhıev.
Qazbek QUTTYMURATULY,
«Egemen Qazaqstan»
Batys Qazaqstan
