Batys Qazaqstan oblysynyń búgingi ekologııalyq jaǵdaıy, problemalyq máseleleri, onyń sheshý joldary men aldyn-alý sharalary týraly baspasóz máslıhatyn ótkizgen Erbol Qýanov bir jyl ishinde oblystaǵy kásiporyndar aýaǵa 63 myń tonna zııandy qaldyq taratqanyn aıtady. Salystyrmaly túrde qarasaq, bul kóp emes. О́ıtkeni 2018 jyly bul kórsetkish Atyraý oblysynda – 180 myń, Aqtóbe oblysynda – 185 myń tonna bolǵan eken.
Qazaqstan respýblıkasynyń Ekologııalyq Kodeksine sáıkes, óńirde 1 sanattaǵy 79 kásiporyn bar eken. Onyń ishinde 60 kásiporyn arnaıy ruqsatyn resimdep qyzmet atqarýda. Osy 60 kásiporynnyń 19-y – munaı-gaz sektoryna tıesili.
Ekologııa departamenti basshysynyń aıtýynsha, 2018 jyly óńirde 138 myń tonna óndiristik qaldyq shyǵarylǵan. Osynyń 108 myń tonnasy – qatty-turmystyq qaldyqtar eken. Aıta ketý kerek, sońǵy jyldary oblysta qoqysty qaıta óńdeý máselesi jolǵa qoıylyp keledi. 2018 jyly barlyq qaldyqtyń 3,4 paıyzy óńdelgen. Bıyl Oral qalasynda qoqys óńdeýshi jańa kásiporyn ashylsa, 2025 jylǵa qaraı barlyq qaldyqtyń 20%-ǵa jýyǵyn qaıta óńdeý josparlanyp otyr eken.
Batys Qazaqstan oblystyq ekologııa departamenti 2018 jyly 157 tekserý júrgizilip, 313 zań buzýshylyq oqıǵasyn anyqtaǵan. Kinálilerge jalpy kólemi 76 013,541 myń teńge bolatyn 214 ákimshilik aıyppul salynyp, onyń 99,6%-y memleket esebine óndirilipti.
Budan bólek, qorshaǵan ortaǵa keltirilgen zııandy óteý talaby boıynsha 84 nusqama berilgen.
Qazbek QUTTYMURATULY,
«Egemen Qazaqstan»
Batys Qazaqstan
