General-leıtenant T.Muhtarov bul kórsetkishti Qarýly Kúshterde tárbıe jáne ıdeologııalyq jumystar júıeli túrde júrgiziletindigimen, tárbıelik is-sharalardyń, áskerı jáne quqyqtyq tártiptiń nyǵaıtylýymen jáne qolbasshylardyń buıryqtarynyń múltiksiz oryndalýymen baılanystyrdy.
– Qarýly Kúshter ótken jyldy jaqsy kórsetkishtermen aıaqtady. Aldymyzda turǵan negizgi mindetter tolyq oryndaldy. О́tkizilgen is-sharalar elimizdiń qorǵanys qabiletin nyǵaıtyp, áskerı qyzmettiń bedelin arttyrdy. Qarýly Kúshterdiń jaýyngerlik ázirligi men qabiletiniń qajet etiletin deńgeıin qamtamasyz etti, – dedi Qorǵanys mınıstriniń orynbasary.
T.Muhtarov odan ári byltyr jaýyngerlik daıarlyqty pysyqtaýǵa arnalǵan 116 is-shara, sondaı-aq 664-ten asa taktıkalyq oqý-jattyǵý ótkizilgendigin málimdedi.
Jalpy, Qorǵanys mınıstrligi negizgi kúsh-qýatyn Joǵarǵy Bas Qolbasshynyń tapsyrmalaryn iske asyrýda jaýyngerlik ázirlikti joǵary deńgeıde ustaý jónindegi josparly mindetterdi sheshýge, áskerlerdi qaıta jaraqtandyrýǵa, kadr daıarlaý sapasyn arttyrýǵa, beıbitshilik pen qaýipsizdikti qoldaý jónindegi halyqaralyq mindettemelerdi oryndaýǵa, Qarýly Kúshterdiń qyzmetindegi prosesterdi avtomattandyrý men sıfrlandyrýǵa, áskerı qyzmetshiler men olardyń otbasy músheleriniń áleýmettik turǵydan qorǵalýyna basymdyq bergen.
Máselen, byltyr qyzmetshilerdiń baspana jaǵdaıyn jaqsartý maqsatynda turǵyn úımen qamtamasyz etýdiń jańa modeli qoldanysqa engizilgen.
– 2018 jyldyń qańtar aıynan bastap aı saıyn áskerı qyzmetshilerdiń jeke arnaıy shottaryna ekinshi deńgeıli bankterde áskerı qyzmettegi eńbek ótiline qaramastan, turǵyn úı tólemderi aýdaryla bastady. Osynyń nátıjesinde 2 myńdaı qyzmetshi baspanaly boldy, 40 myńnan asa joǵary áskerı qyzmetshi turǵyn úı tólemderimen qamtamasyz etildi, – dedi T.Muhtarov.
Qorǵanys mınıstrligi Elbasynyń «Rýhanı jańǵyrý» baǵdarlamasynyń aıasynda óskeleń urpaqqa rýhanı-adamgershilik jáne áskerı-patrıottyq tárbıe berýde de belsendilik tanytqan.
– Oqýshylardyń patrıottyq sana-sezimin, belsendi azamattyq ustanymyn jáne Otanǵa adal qyzmet etýge ázirligin qamtamasyz etý maqsatynda Qorǵanys mınıstrliginiń Ulttyq áskerı-patrıottyq ortalyǵy janynan barlyq óńirlerdegi fılıaldardy qamtı otyryp «Jas sarbaz» respýblıkalyq áskerı-patrıottyq qozǵalysy quryldy. Sondaı-aq 2020 jylǵa deıin áskerı-patrıottyq jumysty jetildirýdiń «Ultjandy sarbaz» tujyrymdamasynyń jobasy ázirlendi, – dep atap kórsetti Qorǵanys mınıstriniń orynbasary.
Sonymen qatar baspasóz máslıhatynda joǵary áskerı bilikti kadrlardy daıyndaý bilim berýdiń barlyq deńgeılerinde serjanttardan bastap generaldarǵa deıingi oqyp-úırenýshilerdiń daıarlyǵynyń sabaqtastyǵyn qamtamasyz etetin 9 áskerı oqý ornyn qamtıtyn bilim berýdiń biryńǵaı kóp deńgeıli júıesinde ótkiziletindigi málim boldy.
General-leıtenant T.Muhtarov elimizdiń 120 adamdyq bitimgershilik rotasy Birikken Ulttar Uıymynyń Lıvandaǵy ýaqytsha kúshteriniń qatarynda tabysty qyzmet etip jatqandyǵyna da toqtaldy.
Serik ÁBDIBEK,
«Egemen Qazaqstan»
