Jobanyń jańaryp, jarqyrap qyzmet kórsetý úshin «Krendel» kondıterlik kásiporny qarjysyn salyp, qajetti jabdyqtar men jıhazdardy satyp aldy.
Sondyqtan, oblys ákimdiginiń qoldaýy men birge qolǵa alynǵan jumys basaldy. Alty aıdaı ýaqyt ishinde burynǵy «Chernoıarka marjany demalys orny ózgerip shıpajaıǵa aınaldy.
Ortalyq árbir kórsetiletin qyzmetke medısınalyq lısenzııa aldy.
Jańa basshylyq pen «Jemchýjına dolgoletııa» JShS seriktestigi arasynda 5 jylǵa memlekettik-jekemenshik áriptestik kelisimsharty jasaldy.
Bul qujatqa sáıkes kásipker zeınetkerlerge áleýmettik qyzmetter kórsetedi. Memlekettik tapsyrys negizinde kezekke turǵandar kestege sáıkes shıpajaıǵa jiberilip otyrady. Kólik qatynasy bar.
Bul kúnderi shıpajaı zeınetkerlerge úzilissiz jumys jasaýda.
Oblystyq jumyspen qamtýdy úıles-tirý jáne áleýmettik baǵdarlamalar basqarmasynyń málimetinshe, shıpajaıda aıyna 110 adamǵa túrli em-shara, saýyqtyrý qabyldaıdy.
Zeınetkerler 12 kún em alyp, demalady. Bıyl 1320 zeınetkerdi qabyldaýǵa ázirlenýde. Shıpajaıda saýyqtyrý úshin emdeý-deneshynyqtyrý sharalary, massaj, fızıoterapevtik em-dom, galokamera, maral múıiziniń emdik qasıetteri qoldanylatyn vannalar, fıto-bar syndy ádister qoldanylady.
Sonymen birge, skandınavııalyq júristiń de tıimdiligi eskerilgen.
Skandınavııalyq júris - sporttyń jańa túri. Bul júrispen áýeli eýropalyqtar aınalysa bastady.
Júristiń ereksheligi- shańǵy taıaqtary sekildi taıaqty paıdalana otyryp júresiz. Jaı júristen aıyrmashylyǵy - denedegi barlyq bulshyq etter qozǵalysqa túsedi.
Mamandardyń aıtýynsha, omyrtqaǵa jaqsy áser etedi. Qan tamyrlary men júrek-qan tamyrlarynyń jumysy jaqsarady. Qarapaıym júristen de aıyrmashylyǵy bar.
Iаǵnı, jyldamdyq mańyzdy emes, júrip kele jatyp tynyǵyp, jattyǵýlar jasaýǵa bolady.
Shıpajaıda barlyq emdeý-saýyqtyrý sharalary dárigerdiń nusqaýymen ári baqylaýymen jasalady. Ortalyqta túrli keshter ótip turady.
Zeınetkerler bos ýaqyttaryn tıimdi ótkizip jatyr. Qysta shańǵy tebedi. Ormanda serýendeıdi. Bes mezgil tegin tamaq beriledi.
Moıyldy shıpajaıynyń balshyǵynan aplıkasııalar jasaý, ıodtalǵan vannalar qabyldaý jasalatyn bolady.
Qos tarapqa tıimdi áriptestiktiń múmkindigin aýdandyq, qalalyq jumyspen qamtý bólimderine tirkelgen óńirdegi árbir zeınetkere paıdalana alady.
Farıda BYQAI,
«Egemen Qazaqstan»
PAVLODAR
