Atam qazaq «júırikke de bir tomar» nemese «súrinbeıtin tuıaq joq» degen emes pe. Mysaly orystyń ataqty balýany Olımpıadanyń úsh, álemniń toǵyz dúrkin, Eýropanyń 12 dúrkin chempıony, dúnıe júzi qaýqar-qaıratyna tańdanyp, tamsanǵan orasan kúsh ıesi Aleksandr Karelın de kezinde jeńilgen. Mundaǵy ózderińiz kórip otyrǵan foto sonyń dáleli.
Oqıǵa bylaı bolypty. 1987 jyldyń 22 qańtarynda klassıkalyq kúresten KSRO chempıonaty Omby qalasynda bastalady. «Ol tusta erkin jáne klassıkalyq kúresten Odaq jeńimpazy ataný álem birinshiliginde júlde alǵannan qıyn edi» dep eske alady qazaq sportynyń tarıhshysy Qydyrbek Rysbekuly.
Joǵarydaǵy chempıonatta asa aýyr salmaq dárejesi boıynsha synǵa túsken alyptar arasynan ózimizdiń qaraǵandylyq balýan Igor Rostoroskıı men jasy 20-ǵa jańa tolǵan sibirlik jigit Aleksandr Karelın fınalda jolyǵady. Ol tusta «Sibir aıýy» asa tanyla qoımaǵan, bir jyl buryn ǵana Shvesııada jastar arasynda ótken klassıkalyq kúresten álem birinshiliginde top jarǵany bar. Al bizdiń jerlesimiz I.Rostoroskıı bolsa jasy 25-ke tolǵan, dúnıe júziniń eki dúrkin (1985, 1987) chempıony, álem kýbogy men Eýropa birinshiliginiń qos altynyn qatar jeńip alǵan, qysqasy jer sharyn jalǵyz ózi eńserip turǵan shaǵy.
Biri álem alyby, biri jalyndaǵan jas bóri. Qos alyptyń aıqasyna ǵalam kóz tikti. Sheshýshi tusta qaraǵandylyq balýan 1:0 esebimen Karelındi jeńdi. Al kelesi 1988 jylǵy qańtar aıynda Tbılısıde ótken KSRO birinshiliginde jerlesimiz Karelınnen 10:0 esebimen utyldy. Utylyp qana qoıǵan joq, kúrespen birjola qoshtasty. О́ıtkeni ol jan balasyn shaq keltirmeıtin bir alyptyń týǵanyn túsindi. Sóıtip Igor balýan 26 jasynda sportty doǵaryp, Qaraǵandy ýnıversıtetiniń zań fakýltetin bitirgen soń jaıyna ketti. Biraq álemdik sport tarıhynda «Sibir aıýyn» jeńgen tuńǵysh balýan retinde tarıhta qaldy.
Beken QAIRATULY,
«Egemen Qazaqstan»
