Sonymen 2005 jyly «Qazaqstan – Ońtústik Koreıa» dostyq qoǵamynyń bastamasymen, Qazaqstan Syrtqy ister mınıstrliginiń Almatydaǵy keńsesi de qoldap, IýNISEF-Qazaqstan Balalar qory men Qazaqstandaǵy ońtústikkoreıalyq iskerler qaýymdastyǵy qolpashtap, jaqsy bir joba júzege asqan edi. Osylaısha memleketaralyq qarym-qatynastar tájirıbesine resmı emes dıplomatııalyq birlik enip − Qazaqstan men Ońtústik Koreıa halyqtary arasynda beıbitshiliktiń bala elshisi paıda boldy.
Sodan beri de zyr etip bir múshel ýaqyt óte shyqqan eken. Endeshe Qazaqstan koreıleri qaýymdastyǵynyń Almatydaǵy bas keńsesinde 16 jasqa tolǵan Narı Ermuhanovaǵa Qazaqstan Respýblıkasynyń azamaty kýáligi saltanatty túrde tapsyryldy.
Qarap otyrsaq, Narıdyń dúnıege kelgeni de qyzyq. 2002 jyly ÝDZ kórsetýi boıynsha ul kútip júrgen Ermuhanovtardyń otbasynda kerisinshe... ekinshi súp-súıkimdi qyz dúnıege keledi. Dál osy súıinshili sátte Azııa qurlyǵynda ótip jatqan fýtbol matchtary da aıaqtalyp, sýdıa ysqyryǵy estiledi. Sol sátte Ońtústik Koreıa ulttyq komandasynyń Eýropanyń azýly komandasyn jankeshtilikpen jeńýi «fýtbol fanatyna» jigerli áser berip, dúnıege kelgen sábıine koreı halqynyń esimin berýge sheshim qabyldaıdy. Sol sátte áriptesimiz Manarbek Ermuhanov óz qııalynda keleshekte Qazaqstannyń ulttyq quramasy da teńbil doptyń álemdik tarlandaryn oısyrata jeńetin oıynshylarǵa aınalsa degen arman bolǵanyn aıtady.
On alty jyl buryn jýrnalıst Manarbektiń nárestesine Narı esimin berýge Qazaqstan koreıleri qaýymdastyǵy ǵana emes, elimizdiń fýtbol federasııasy da aralasyp, qýanyshyna ortaqtasady. Jáne bul jańalyq kóp uzamaı «KBS» koreı ulttyq telearnasynan da kórsetiledi. Osydan keıin araǵa úsh jyl salyp «Jas otaý» neke saraıynda ótken Ońtústik Koreıa eli táýelsizdiginiń 60 jyldyǵyna arnalǵan saltanatty jıynda Narı Álem elshisi atanady.
13 jyldy artqa tastaǵan osynaý qoǵamdyq bastama eki memlekettiń prezıdentteri – Nursultan Ábishuly Nazarbaev pen No MýHen tarapynan qoldaý taýyp, beldi basylymnyń birinde atalyp ótkeni de este.
Jáne bul oqıǵa osy saltanatty sátke kýá bolǵan Reseı halyq jazýshysy Anatolıı Kımdi de tolqytyp, «Arına» atty kezekti romanynyń sıýjetine áserli ózgerister engizedi.
Mine, sol Narı da kámelettik jasqa toldy. Qazir Almatydaǵy №111 gımnazııanyń úzdik shákirtteriniń biri. Súıikti pánderi boıynsha óz mektebiniń namysyn qalalyq, respýblıkalyq baıqaýlarda qorǵap júrgen ozat oqýshy. Basketbol men sporttyq bı jarystarynda da zamandastaryna des bermeıtin daryn. Onyń sheber qoldary saz balshyqtan tamasha músinder týdyryp, keste toqýdan da jalyqpaıdy.
Ana tilimen qosa aǵylshyn tilin erkin meńgergen táýelsizdiktiń tóli Qazaqstan koreıleri qaýymdastyǵy uıymdastyrǵan barlyq sharalardyń eń jas ta súıkimdi qonaǵy.
Bolashaqta dıplomat bolýdy oılastyryp júrgen Narı búkil órkenıetti álem kóksegendeı, keleshekte KHDR men Ońtústik Koreıanyń birigip, biregeı elge aınalýyn armandaıdy.
Aınash ESALI,
«Egemen Qazaqstan»
ALMATY
