85 jyl densaýlyq kúzetinde
Sársenbi, 7 qarasha 2012 7:25
«Almaty Taýers» kesheninde Almaty qalasy Densaýlyq saqtaý basqarmasynyń qurylǵanyna 85 jyl tolýyna oraı «Densaýlyq saqtaý salasynyń ózekti máseleleri» atty halyqaralyq kongress ótti. Elimizdiń medısına salasynyń tanymal ǵalymdary, ǵylymı-zertteý ınstıtýttary men ortalyqtarynyń basshylary, qalanyń medısına qaýymy ókilderi men ardagerleri bas qosqan alqaly jıynǵa qatysýshylar densaýlyq saqtaý salasynyń zamanaýı basqarý tásilderin, sondaı-aq osynaý mańyzdy salany damytýda qaı baǵytqa erekshe nazar aýdarý qajettigin talqylady.
Sársenbi, 7 qarasha 2012 7:25
«Almaty Taýers» kesheninde Almaty qalasy Densaýlyq saqtaý basqarmasynyń qurylǵanyna 85 jyl tolýyna oraı «Densaýlyq saqtaý salasynyń ózekti máseleleri» atty halyqaralyq kongress ótti. Elimizdiń medısına salasynyń tanymal ǵalymdary, ǵylymı-zertteý ınstıtýttary men ortalyqtarynyń basshylary, qalanyń medısına qaýymy ókilderi men ardagerleri bas qosqan alqaly jıynǵa qatysýshylar densaýlyq saqtaý salasynyń zamanaýı basqarý tásilderin, sondaı-aq osynaý mańyzdy salany damytýda qaı baǵytqa erekshe nazar aýdarý qajettigin talqylady. Sondaı-aq , forým aıasynda álemniń 15 elinen, ıaǵnı Reseı, AQSh, Indııa, Avstrııa, Japonııa, Nıderlandy, Belarýs, Lıtva, Fınlıandııa, Shvesııa, Horvatııa, Ońtústik Koreıa, Germanııa, Polsha, Qyrǵyzstannan kelgen medısına salasynyń jetekshi mamandary sheberlik synyptaryn ótkizip, otandyq dárigerlermen tájirıbe almasýy kongrestiń mazmunyn arttyra tústi.
Mereıtoılyq jıynnyń betashary ótkendi ekshep, tarazylap alý maqsatynda Almaty qalasy densaýlyq saqtaý júıesiniń tarıhyna arnalǵan derekti fılmdi kórsetýmen bastaldy. Odan keıin sóz alǵan Almaty qalasy ákiminiń orynbasary Serik Seıdýmanov qala turǵyndarynyń densaýlyǵyn saqtaý isinde aq halatty abzal jandardyń jankeshti eńbekterin joǵary baǵalaı kele, 1927 jyldyń 1 qazanynda Almaty qalasy densaýlyq saqtaý basqarmasy qurylǵan kezde onyń quramynda meńgerýshi men hatshy ǵana qyzmet atqarsa, al qazirgi tańda 82 qalalyq, 40-tan astam respýblıkalyq, 950 jekemenshik medısınalyq mekeme baryn maqtanyshpen atap ótti. Búginde qalalyq mekemelerdiń ózinde 5 myńǵa jýyq dáriger men 9 myńnan astam orta medısına qyzmetkerleri jumys jasaıtynyn tilge tıek etti.
Akademıkter Tóregeldi Sharmanov pen Kamal Ormantaev almatylyq áriptesterin mereıtoılarymen quttyqtap, júrekjardy ystyq lebizderin bildirdi, kongress jumysyna sáttilik tiledi. Densaýlyq saqtaý mınıstrliginiń Medısınalyq kómekti uıymdastyrý departamentiniń dırektory Ajar Tóleǵalıeva aldymen Densaýlyq saqtaý mınıstrligi men mınıstr S.Qaıyrbekovanyń atynan jınalǵandardy mereıtoıǵa arnalǵan is-sharanyń ashylýymen quttyqtap, qazirgi tańda Almaty qalasynyń medısınasy Qazaqstannyń densaýlyq saqtaý júıesiniń aldyńǵy leginde ekenin, medısınalyq kómek tek qala turǵyndaryna ǵana emes, elimizdiń aımaqtarynan keletinderge de kórsetiletinin jetkizdi. «Sońǵy 20 jylda Qazaqstannyń densaýlyq saqtaý salasynyń barlyq baǵytynda júıeli damý úderisi júrýde. Onda qarjylandyrý 10 eseden astamǵa ósip, 500-ge jýyq jańa nysandar salynsa, sońǵy 3 jylda Almatyda eń zamanaýı quraldarmen jabdyqtalǵan 11 jańa aýrýhana men emhana boı kóterdi. Búginde Almaty eń kúrdeli otalar jasaıtyn medısınalyq ortalyqqa aınaldy. Máselen, júrek, baýyr, búırek aýystyrý buryn jasalmaǵan otalar. Endeshe, Almatynyń múmkinshiligi zor, búgingisi mártebeli, bolashaǵy jarqyn», – dedi Ajar Tóleǵalıeva.
Sondaı-aq, kongreste S.Asfendııarov atyndaǵy QazUMÝ-da «Densaýlyq saqtaý salasyndaǵy menedjment», «Terapııa», «Kardıologııa», Ortalyq qalalyq klınıkalyq aýrýhanada «Hırýrgııa», №2 Balalar qalalyq klınıkalyq aýrýhanada «Akýsherlik-gınekologııa, neonatologııa-pedıatrııa, anestezıologııa-reanımasııa», №4 qalalyq klınıkalyq aýrýhanada «Travmatologııa» taqyryptary boıynsha plenarlyq keńester ótkizildi. Onda atalmysh ár sala boıynsha ózekti máseleler kóterilip, olardy sheshý joldary qarastyryldy.
Gúlzeınep SÁDIRQYZY,
«Egemen Qazaqstan».
