Qurylysy qyryq quraý kardıohırýrgııa ortalyǵy
Beısenbi, 19 sáýir 2012 7:39
Pavlodarda kardıohırýrgııa ortalyǵynyń qurylysy bastalǵanda jergilikti turǵyndar bir serpilip qalǵan edi. «100 mektep, 100 aýrýhana» baǵdarlamasyna sáıkes elimizdiń Densaýlyq saqtaý mınıstrliginiń tapsyrysy boıynsha qolǵa alynǵan. Jobalyq-smetalyq quny 7,6 mlrd.teńge turatyn ortalyq 50 tósektik. Munda jylyna 700-deı kúrdeli operasııa jasalýy tıis. 2010 jyldyń mamyr aıynda iske qosylýǵa tıis ortalyqtyń qurylysy áli aıaqtalǵan joq.
Beısenbi, 19 sáýir 2012 7:39
Pavlodarda kardıohırýrgııa ortalyǵynyń qurylysy bastalǵanda jergilikti turǵyndar bir serpilip qalǵan edi. «100 mektep, 100 aýrýhana» baǵdarlamasyna sáıkes elimizdiń Densaýlyq saqtaý mınıstrliginiń tapsyrysy boıynsha qolǵa alynǵan. Jobalyq-smetalyq quny 7,6 mlrd.teńge turatyn ortalyq 50 tósektik. Munda jylyna 700-deı kúrdeli operasııa jasalýy tıis. 2010 jyldyń mamyr aıynda iske qosylýǵa tıis ortalyqtyń qurylysy áli aıaqtalǵan joq.
Ústimizdegi jyldyń qańtar aıynda Memleket basshysy Nursultan Nazarbaevtyń tóraǵalyǵymen Úkimettiń keńeıtilgen otyrysy ótkeni belgili. Osy jıynda elimizde qabyldanǵan «100 mektep, 100 aýrýhana» baǵdarlamasy boıynsha josparlanǵan 103 emdeý nysanynyń 57-si ǵana paıdalanýǵa berilgeni málim boldy. Sol paıdalanýǵa berilmeı qalǵan 46 emdeý ornynyń qatarynda Pavlodardaǵy kardıohırýrgııalyq ortalyq ta bar. Biz sylaq, syrlaý, aǵartý jumystary júrip jatqan ortalyqty aralap kórdik. Qasymyzda osy qurylysty júrgizip jatqan astanalyq «Jańa qurylys SPK» seriktestiginiń jaýapty ókili Qanat Ibraev bar, jertólege de tústik.
Sóz reti kelgende aıta keteıik, Densaýlyq saqtaý mınıstrliginiń ókili Serik Mýsın Astanaǵa ketip baramyn dep bizben suhbattasýdan at-tonyn ala qashty. Merdigerler 80-90 paıyzǵa daıyn dese de, 6 birdeı bólimshe-blok korpýstaryn aralap shyqqanda baıqaǵanymyz – áli kezegin kútip turǵan jumys bastan asady. Joǵary jaqtaǵylar «Aldaǵy mamyr aıynda qaıtseńder de tapsyrýlaryń kerek» – degenmen tórt-bes jyl ishinde bitpegen qyryq quraý, myń buraý qurylys jumystarynyń basyn qosyp rettep, endi qalǵan eki aıdyń ishinde bitirip, saqadaı-saı etip shyǵarý múmkin emes sııaqty. Munyń sebebi, Qanat Ibraevtyń aıtýynsha, másele taǵy da qarjyǵa kep tirelip tur. Bul ne degen sonda bitpeıtin, túbine jetip bolmaıtyn qarajat, 7 mlrd. teńge! Jetpedi me dep tańǵalasyń. Bólingen qarajatqa qurylys ta júrgizildi, sheteldik jabdyqtar, qondyrǵylar da alyndy deıdi. Qurylysy áli bitpegen ortalyq bólimsheleriniń ishinde ústiniń shańy bes eli qymbat sheteldik medısınalyq qural-jabdyqtardy kórgende jaǵamyzdy ustaǵandaı boldyq. Tipti, osydan eki jyl buryn ákelingen baǵasy asa qymbat sheteldik magnıtti rezonanstyq kompıýterlik tamograf qurylǵysy elektr qýatyna qosylyp qoıylypty. Onyń mánin suraǵanymyzda, mamandar bul qurylǵylar sál ýaqyt elektr qýatynan ajyratylǵan jaǵdaıda qoldanysqa múldem jaramsyz bolyp qalatynyn aıtty. Aınala qurylys jumystary júrip jatyr. Sonda erteńgi kúni bul qurylǵylardyń durys jumys jasaıtynyna kim kepil.
Aıta bersek, osyndaı soraqylyqtar tolyp jatyr. Sonymen, ortalyq ýaqytynda qurylysy bitip, nege ashylmady? Bul suraqqa jańa ortalyqqa qyzmetke kelmekshi dárigerlerdiń de, oblystyq densaýlyq saqtaý basqarmasynyń da jaýaby bir, qarjyǵa baılanysty bolar, joba qurylysynda kútpegen máseleler týyndaǵan ba, ol jaǵy bizge belgisiz,– deıdi. Ol qandaı máseleler? Jalpy, bul jobany áýelde 2007 jyly ortalyqtyń qurylysyn salý jóninde jarııalanǵan konkýrsta nemistiń bir kompanııasy jeńip alǵan kórinedi. Eýropada salynatyn túrli medısınalyq mekemelerdiń qurylysyn jobalaıtyn bul kompanııa úsh qabatty ortalyq salmaqshy bolady. Keıin Densaýlyq saqtaý mınıstrligi jobaǵa ózgerister engizip, ortalyqty 2 qabatty etip turǵyzý jóninde sheshim shyǵarǵan kórinedi. Al, 3-shi qabat alynsyn degen sheshim shyqqan soń, jeke-jeke salynǵan ortalyqtyń blok-korpýs-bólimsheleriniń úshinshi qabattary jáne olardyń ortasyn áınekti jabyndymen qosyp turatyn galereıaaralyq bóligi alynyp tastalypty. О́zińiz oılap qarańyz, qanshama shyǵyn jasaldy, qanshama ter tekke tógildi.
– Bólimsheler ortasyn qosatyn áınekter soltústiktiń aıazyna shydamaýy múmkin, jobanyń ózgertilýine, qaıtadan jasalýyna osy sebep bolǵan sııaqty, – deıdi bizben áńgimesinde Qanat Ibraev. Múmkin, solaı da shyǵar. Ony mınıstrlik nege erte oılastyrmaǵan. Joǵaryda jertólege de túskenimizdi aıttyq. Ádette, munda sý-jylý júıeleri, ǵımarattyń jumysyn qamtamasyz etetin qondyrǵylar ornalasatyny belgili. Solaı desek te, munda jertólede de halyqtyń sapyrylysyp júretin túri bar. О́ıtkeni, qoımalar, kıim ilgish, kir jýatyn jer, zerthana – bári osynda. Bir tańǵalarlyq jaǵdaı – bul nysannyń qurylysy jobalaý-smetalyq qujattary memlekettik saraptaýdan ótpeı turyp-aq bastalyp ketken. Budan Pavlodar qalasyndaǵy kardıohırýrgııalyq ortalyqtyń jalpy nemis jobasymen salynýyna kezinde kelisim berilmedi me eken degen oı keledi, biraq, sol qarsylyqqa qaramaı, qurylys bastaýǵa qujaty bolmasa da, joǵary qyzmet babyn paıdalanǵan sheneýnikter qol qoıǵan máseleniń búgin mynadaı mıpalaý jaǵdaıǵa túskeni ókinishti. Al, qujatty 2011 jyly jeltoqsan aıynda ǵana alypty. Sonda, oǵan deıin úsh jyl boıy bul qurylys zańsyz, qujatsyz salynǵan bolyp shyqqany ma?..
Al, jergilikti bılik, densaýlyq saqtaý basqarmasy mınıstrlik ózderi tapsyrys berdi, ózderi jaýapty dep boılaryn aýlaq salǵanǵa uqsaıdy. Áıtpegende, osy oryndardyń oblys ortalyǵynda qolǵa alynǵan mańyzdy áleýmettik nysanǵa baqylaý jasap, mınıstrlikti mundaǵy keleńsizdikterden der kezinde habardar etýlerine, sóıtip, qujatsyz salynyp jatqan kúmándi qurylysty toqtatýlaryna bolatyn edi ǵoı.
Toqsan aýyz sózdiń tobyqtaı túıini – bul iske jaýapty laýazymdy basshylardyń elimizde qabyldanǵan «100 mektep, 100 aýrýhana» memlekettik baǵdarlamasyn oryndaýda talap pen tártip, jaýapkershilik údesinen shyǵa almaǵandary aıdan anyq.
Farıda BYQAI,
Pavlodar.
