«Barlyqtaryńyzdy qýantqym keledi: biz elimiz boıynsha jańa úıler salyp, paıdalanýǵa berý jóninen kósh bastap kelemiz. 2,3 mln sharshy metr, 23 myń páter. «Nurly jer» baǵdarlamasy boıynsha da elordamyz Qazaqstan boıynsha kósh basynda keledi. 110 myń sh. m. –1 419 páter. 15 TK salynyp jatyr. Bul – shamamen 4,5 myń páter, onyń ishinde 3106 páter osy jyly paıdalanýǵa beriledi», – dedi Astana ákimi Baqyt Sultanov halyqqa esep berý barysynda.
Sonymen qatar, 228 apatty úı buzylyp, 3,5 myńǵa jýyq otbasy jańa jaıly páterlerge ıe boldy. «7-20-25» baǵdarlamasy boıynsha 1 875 otbasy 27 mlrd teńgege nesıe alady. Baǵdarlama qoljetimdi bolýy úshin jańa jyl qarsańynda ákimdik bilim berý, densaýlyq saqtaý jáne polısııa qyzmetkerlerine turǵyn úı sertıfıkaty túrinde 1 mln teńgeden 100 sýbsıdııa bóldi, bıyl taǵy 2 myń sertıfıkat beriledi dep josparlanýda.
«Turǵyn úı sertıfıkattary meniń ózime qatty óte unaıdy. Biraq bir másele bar: bári birdeı talaptan óte almaıdy. Áıtpese, 2 myń sertıfıkat – kúnine 5 sertıfıkat degen sóz. Biraq bul shyn máninde sheshimdi talap etetin másele. Jumys isteıtin bolamyz», – dep atap ótti B.Sultanov.
Qala ákimi úlestik qurylysqa baılanysty máseleler onyń jeke baqylaýynda ekenin erekshe atap ótti.
«Biz vedomstvoaralyq komıssııa aıasynda aldanǵan úleskerlermen turaqty kezdesýler ótkizemiz. Men aıtqandaı, qalaǵanymyzdaı bul máseleni tez arada bolmaǵanymen, sheshemiz. Qabyldanǵan sharalardyń arqasynda biz problemaly nysandardyń sanyn 68-den 29-ǵa deıin qysqarttyq. Bul – 10 344 úlesker. Biz «Jol kartasyn» ázirledik. Sonymen, bizdiń jospar 2022 jylǵa deıingi merzimdi qamtıdy. Memlekettik qarajat bólindi. Olar, birden atap óteıin, qaıtarymdy. Jumystar júrgizilýde. Tabysty sátter kóp. Jumystar da kóp. Biraq taǵy da qaıtalaımyn: bul – meniń jeke baqylaýymdaǵy úlestik másele», – dedi Sultanov.
Budan bólek, stýdent jastardy turǵyn úımen qamtamasyz etý máselesi de sheshilýde. Qazirgi ýaqytta Astanada 90 myńǵa jýyq stýdent turady. 32 jataqhana jumys isteıdi, onda 14 myń stýdent turady. Alaıda taǵy 11 myń stýdent ornalastyrýdy qajet etedi. Osyǵan baılanysty ákimdik joǵary oqý oryndaryna qurylys úshin 15 jer telimin bóldi.
Kolledj stýdentteri úshin turý máselesi jergilikti bıýdjetten memlekettik tapsyrys arqyly hostelderge ornalastyrý esebinen tolyq sheshildi. Bul ǵımarat qurylysyn únemdeýge jáne daıyn ınfraqurylymdy tıimdi paıdalanýǵa múmkindik berdi.
