Ashylý rásimine Túrkistan oblysynyń ákimi J.Túımebaev pen Qoǵamdyq damý vıse-mınıstri J.Omarbekova, sonymen qatar depýtattar, qoǵam qaıratkerleri qatysty. Sondaı-aq aýdan qala ákimderi, basqarma basshylary, respýblıkalyq qoǵamdyq uıymdardyń ókilderi men aýdan, qalalyq jastar resýrstyq ortalyqtarynyń basshylary jáne óńirdiń 200-den astam belsendi jastary keldi.
Ortalyqtyń ashylýymen quttyqtaǵan oblys ákimi jastardy erkin pikir almasýǵa shaqyrdy. «Osy kezdesýdiń aldynda men jańadan ashylǵan ǵımaratty aralap, tanysyp shyqtym. Munda jastardyń jan-jaqty damýyna, boıyndaǵy óneri men qabiletterin arttyrýyna tolyq jaǵdaı jasalǵan. Mysaly, kásipkerlikpen aınalysam deýshilerge Kovorkıng alańy, IT-park, zańgerlik keńester qarastyrylǵan. Sonymen birge eriktiler klýby, «Jas sarbaz», elektrondy kitaphana, tilder mektebi, ınternet jelisi, májilis zaly, sport alańshalary jáne taǵy basqa ıgilikter bar. Bul – sizder úshin jasalǵan úlken qoldaý. Endi osy jastar ortalyǵynda órenderimiz óz-ózderin damytyp, bilimderin shyńdaýlary qajet», – dedi J.Túımebaev.
Jastar ortalyǵy – bir mezette 400-ge jýyq jasqa qyzmet kórsete alady. Ortalyqta kóptegen jastar klýbtary, mektepter men úıirmeler jumys isteıdi. Sondaı-aq, ǵımarat ishinde «relax zone» demalys aımaǵy, syrtqy bóliginde fýtbol, voleıbol, basketbol, tennıs oınaýǵa arnalǵan sporttyq alańshalar ornalasqan.
Ǵalymjan ELShIBAI,
«Egemen Qazaqstan»
Túrkistan oblysy
