«Elbasy tapsyrmasymen Úkimet Astana qalasyn damytý jónindegi keshendi jospar qurdy. Qoıylǵan maqsatqa qol jetkizý úshin tirshilikti qamtamasyz etý júıelerin, áleýmettik nysandar, qoljetimdi turǵyn úı salý, jol-kóliktik ınfraqurylymdy jáne ındýstrııalyq aımaqtardy qamtamasyz etý, qalany abattandyrý jáne qaýipsizdik baǵytyn damytý boıynsha jobalar iske asyrylatyn bolady. Jalpylaı alǵanda, keshendi jospar aıasyndaǵy is-sharalardy iske asyrýǵa bes jyl ishinde 1,5 trıllıon teńge ınvestısııa quıylatyn bolady. 10 myńnan astam jumys orny ashylady. Bizdiń maqsat – qalany jaıly, qaýipsiz, yńǵaıly etý», – dedi Asqar Mamın Astana qalasynyń ákimi Baqyt Sultanovtyń turǵyndar aldyndaǵy eseptik kezdesýinde.
Spıker atap ótkendeı, júrgizilip otyrǵan áleýmettik saıasattyń negizgi maqsaty – halyq tabysyn ulǵaıtý, laıyqty ómir súrý sapasyn qamtamasyz etý.
«Birinshiden, turǵyndardyń qoljetimdi ári sapaly baspanamen, bilimmen jáne medısınalyq qyzmettermen qamtamasyz etýge qatysty negizgi qajettilikterin qanaǵattandyrý. Memleket basshysy kommýnaldyq qyzmet tarıfterin, azyq-túlik jáne dári-dármek baǵasyn erekshe baqylaýda ustaýdy tapsyrdy. Ekinshiden, Astana ákimdiginiń aldyna jańa jumys oryndaryn ashý, shaǵyn jáne orta bıznestiń damýyna qolaıly orta qurý talaptary qoıylǵan. Úshinshiden, halyqtyń áleýmettik osal toptaryn: kópbalaly analar, múgedekter, az qamtylǵan otbasylardy qoldaýda naqty sharalardy júzege asyrý», – dep túıindedi sózin A. Mamın.
Vıse-premer Memleket basshysynyń tapsyrmasy boıynsha Úkimet Astanany damytýdaǵy áleýmettik-ekonomıkalyq ózekti mindetterdi sheshýde yqpal etetindigin aıtty.
